Chelsea manager Frank Lampard chu Jadon Sancho player ngaihsan thin tlemte zinga mi niin tun hnaiah a sawi.

Bundesliga club lian Borussia Dortmund winger Jadon Sancho chuan thawm a nei lian chho hle a, Premier League club eng emaw zat chuan lak luh duhin an ngaihven hle a, hetianga sawi rik zingah hian Chelsea pawh an tel a ni.

Jadon Sancho chuan tun hma deuha player thenkhat a ngaihsan thinte a sawi a, heng zingah hian Chelsea player ni thin pahnih hming a tel a, hei vang hian Stamford Bridge lama kal pawh a hreh loh ringtu an awm phah a ni.

Kum 19-a upa Jadon Sancho chuan, “Brazil legend Ronaldinho inkhel leh a che vel kha YouTube velah ka en nasa ber a, a chet dan te, a inkhelh dan te leh a ball khawih thin dante kha ka en chik thei hle a, inzirna atan ka hmang thin,” a ti.

“Chelsea tana an khelh laiin Frank Lampard kha ka duh thei khawp mai a, Didier Drogba pawh kha ka duh em em bawk a. Heng player pathumte hi ka duh zualte an ni thin a, ka ngaisang a, ka entawn nasa thei hlawm hle,” a ti bawk.

Tun season kal mekah Sancho hian bul a tan tha chho viau a, Lampard-a vanglai ang deuh bawkin lehlam pawl box chhungah a hun takah a lo awm fuh thei viau zel a ni.

Tun hnaia Borussia Dortmund game khelh hnuhnung 8 ah Sancho hian goal a thun thei tawh lo a, kar tawpa Bayern Munich an hneh loh tum khan coach Lucian Favre chuan minute 36 chiah a khelhtir nghe nghe a ni.

England winger Sancho hi Chelsea chuan tun hnaiah an ngaihven thar viau a, anni bakah hian Manchester United, Manchester City, Liverpool leh Real Madrid te chuan an thlithlai ngun hlawm hle a ni.