Chelsea player hlui Eden Hazard chuan tuna Chelsea manager Frank Lampard chu manager khawvelah la nau viau mahse a che tha nghal chu mak a tih loh thu a sawia, khawvela manager tha ber zingah Lampard chu a inhlankai theih ngei a beisei thu Hazard hian a sawi bawk.

Chelsea chuan tun nipui lai khan an legend Lampard chu an manager atan an ruaia, Lampard hian nikum atang maiin manager hna thawk tan mahse Chelsea hi a chet thatpui thawkhat hle a, tunah hian Premier League table-ah pawh pathumnaah awmin an chung chiaha awm Leicester City nen an point a inang chiah bawk.

Hazard hian tun nipui chhung khan Chelsea a chhuahsana, Chelsea-a a lo khelhpui tawh thin Lampard nen hian an inhrawn hman ta lo chiah chiah a, Hazard chhuak mahse Chelsea hi an buai lo viau niin a lang mek.

Hazard chuan Lampard-a chungchang sawiin, “Chelsea-ah Frank a che tha nghal hi mak tihna pakhat mah ka nei lova, Frank hi player angin ka hria a, manager ang erawh chuan hre lo mah ila mi tha tak a ni tih ka hria. Thla li chhungin khawvela manager tha ber zinga mi a ni thei tih a lan tir nghal.

“Thil tha leh em em chu Chelsea hi player naupang tak tak hmangin an khela, English player an ni fur bawk nen England tan a thahle a, chutih rualin Chelsea tan pawh a tha a, player naupang tha tak tak an nei hi an an vannnei hle in ka hria.

“Bazar thei lo tura hrem an ni hi Chelsea hian an thatpui zawk leh thatpui zawk loh ka hre lova, a chhan chu player thar pahnih emaw pathum emaw vel neih belh se chuan pakhatnaah an awm maithei. An khel a hmuhnawm a, an tangrual em em bawk.

“Chelsea-ah hian thian tha tak tak ka la nei renga, anmahni hi ka la chhuizui reng, tunhnaiah an che thaa, an kaltluanga, ka lawmpui hle a ni,” a ti.