12 Feb 2020 05:17

inkhel

Lalremsiami zinkawng zawh a thui zel

Lalremsiami chu FIH Rising Star of the Year 2019 atan an thlang a, a beisei loh tak mai a nih laia hetiang chawimawina a dawng hi lawmawm a ti hle.

Chawimawina a dawn tirh khan lawmthu a sawi nghal a, ““A hmasa berin hetiang dinhmuna ding thei tura min hruaitu Pathian hnenah lawmthu ka sawi a. 2011 atang khan hockey hi ka khel tan a, Thenzawl Hockey Academy atangin bul ka tan a. 2016 thleng khan kum 5 chhung chu hockey ka khel hman a, hemi hnuah hian Delhi khawpuia National Academy ka zawm a, India camp ka zawm zui ve leh a ni. Tunah chuan RCA Kapurthala-ah ka thawk mek a, Hockey India bakah ka teammate te leh coaching staff zawng zawng chungah lawmthu ka sawi a ni,” a ti.

Mizo tleirawl Lalremsiami hian a kum phu loin zinkawng a zawh thui ve ta hle a, English leh Hindi pawh thiam mumal lo khan tunah chuan bo miah loin a duh ang chu a sawi chhuak ve thei vek tawh a ni.

2016 kumah khan Siami hian India ai a awh tan a, Bangkok khawpuia U-18 Asia Cup an khelhah a tel ve a. China nen game pawimawh tak an khel a, hetah hian Siami chuan minute 7-ah goal thunin India chu hma a hruaipui a. Half time hma hretin goal dang a thun belh leh a, India chu 3-2 in a chakpui a ni.

Senior team lama a tel hnuah player pawimawh tak a ni chho zel a, Japan rama 2017 Asia Cup an khelhin an game hmasa berah Singapore lakah goal a thun nghal a, semi final-ah Japan nen an inkhelh pawhin a thun leh bawk a ni.

2018 ah khan Donghae a Asian Champions Trophy an khelhin captain Rani Rampal chu an awltir a. Golden Girls chuan minute 10 chauh a awm tawh tihin Korea chu 0-1 in an hneh lo mek a, Lalremsiami chuan penalty corner a hlawh chhuak a, amah hian goal thunna hun remchangah a hmang zui nghal a ni.

Kum 18 chauh niin he tournament-ah hian Lalremsiami chu Rising Star Player U-21 award an hlan nghe nghe a ni.

A thiamna piah lamah tumruhna a nei nasa em em a, hlawhtlin duh tlat mi niin, nikumah khan Hiroshima khawpuia FIH Series Finals an khel a. Semi final an khelh hma niin a pa thih thuin a deng a, heti chung hian Kolasib lam pan a, a pa ruang thlah ai chuan India tana ke pen zui zel chu a thlang hial a ni.

Tlar hma lama senior player rual Rani Rampal, Vandana Katariya leh Navjot Kaur te nen an inkawp chu khawvela team dangte pawhin an hre chiang tawh hle a, an hlauhawm zia chu sawi nawn a ngai tawh lo hle.

Tokyo 2020 Olympics atan an inbuatsaih chho mek a, hmabak hautak leh phurawm takin Lalremsiami chu a hmuak mek a ni.