18 Feb 2019 05:14

inkhel

Lakers hi playoff khelhpui ka tum: LeBron James

2019 NBA All-Star Game ah Team LeBron chuan Team Giannis an hneh a, an inkhelh hnu hian LeBron James chuan LA Lakers chu NBA playoff khelhpui theih ngei a tum thu a sawi.

Kevin Durant chuan point 31 a score a, MVP atan thlan a nih bakah Team LeBron chu 2019 NBA All-Star Game ah 178-164 in a chakpui bawk a ni.

Team LeBron leh Team Giannis te chu 2019 NBA All-Star Game ah hian an inhmachhawn a, Team LeBron te hian 3-pointer vawi 90 an attempt a, hengah hian vawi 35 chu an thun thei a ni.

Durant chuan minute 2 chauh a awm tawh tihin 3-point a thun a, 171-160 in hma an hruai theih phah a. Spectrum Center-a inkhelah hian Kyrie Irving pawh a che chhe lem lo hle a, a tawp dawnah Durant chuan a sir lam feet 15 atangin a thun leh bawk a, an team chak theihna bulpui a ni a tih theih.

LeBron James chuan he inkhelah hian point 19 a score bakah rebound 8 lain assist 4 a nei bawk a. Inkhelh zawh hian James chuan Los Angeles Lakers chu playoff khelhpui ngei a tum thu a sawi zui a ni.

Nikum Krismas khan James hi a inhliam a, a inhliam atang hian Lakers chu an tlahniam zui a, Western Conference-ah palina atangin sawmnaah an tla a. All-Star Game an khelh zawh hnu lawkah hian James chuan a team te chu nasa taka hma sawnpui a tum thu a sawi nghal a ni.

James chuan, “Season chawhnu lam kan hmang chho dawn a, inkhelh chhoh leh vat vat ka duh a. Playoff khel thei tura theihtawp chhuah a ngai a, chumi tipuitling thei tur chuan tan kan lak a ngai a. Chutiang bak ngaihtuah ka nei lo a ni,” a ti.

“Thla hnih lo awm turah hian eng dang mah ngaihtuah ka tum lo a, Lakers hi playoff khelhpui ngei tumin tan ka la dawn a. Ka inhliam hmaa tha taka kan khel thei ang khan tunah pawh khelhpui leh ka tum dawn a, kan tih theih ngei pawh ka ring,” a ti bawk.

A sawi zelnaah, “Court chhunga min luhtir chuan inkhelh nuam ka ti a, inelna hmachhawn tluka nuam tih ka nei lo a. Intihsiakna ngaina mi ka ni a, ka inkhelh reng rengin theihtawp ka chhuah zel thin. Kan hmabakah pawh hian inelna thinlung pu chungin engkim ka ti chho zel dawn a ni,” a ti.