Magic Johnson chuan Los Angeles Lakers chu an inla thar nasa bawk a, hneh theih loh tluka tha an nih tawh dawn thu a sawi.

Los Angeles Lakers chuan tun hnaiah player an la thar nual a, an lak hnuhnun ber chu Avery Bradley a ni a. Bradley hi Magic Johnson chuan tha a tiin, a ngaisang hle a, hei vang hian team pawhin an tangkaipui viaua a rin thu a sawi a ni.

Johnson chuan Bradley defense leh perimeter shooting te chu a fak hle a, kum 28-a upa guard hi duhthusam a nih thu a sawi chhuak hial a. Bradley hian LA-ah kum hnih hmang turin contract a ziak a, a contract ziah hi $9.7 million hu vel niin a agent Bill Duffy chuan a sawi chhuak.

Avery Bradley hian 2018-19 season kha Clippers-ah bul a tan a, February thlaah khan Memphis lamah an kaltir a, JaMychal Green leh Garrett Temple te nen an inthleng a. Grizzlies tana a khelh chhungin Bradley average chu game tinah point 16.1 leh assit 4 niin, field shot 40.8 per cent leh three-point range shot 35.1 a ni.

Bradley hian Los Angeles Lakers-ah player thar dang Anthony Davis leh DeMarcus Cousins te leh a dang thenkhat a zawm ang.

“Avery Bradley hi player tha chungchuang tak mai a ni a, Lakers hian an thlang fuh ka ti khawp mai a. A thiamna hi a sang a, defense lamah a tha em em a, hetih rual hian three-point a thun thei em em bawk a, team tana tangkai tak tur a ni,” tiin Magic Johnson chuan a sawi.

“Lakers hi an tha tawh khawp mai a, LeBron James, Anthony Davis, Danny Green, Avery Bradley leh Kyle Kuzma te an nei a, hneh theih loh tluk chu an ni ber tawh,” a ti bawk.

Lakers chuan Kawhi Leonard an beisei a, an chang ta si lo a, hemi hnuah hian player dang an melh kual ta nual a. Danny Green, Kentavious Caldwell-Pope, JaVale McGee, Quinn Cook, Rajon Rondo leh Alex Caruso te chu an la tawh a ni.

Kawhi Leonard chu hun rei tak chhung LA nen an lo sawi zawm tawh a, mahse tun hnaiah Clippers a zawm tur thu a sawi chhuak a ni.

Magic Johnson chuan, “LA chu basketball hmunpui a ni ber tawh mai a, tun season lo awm turah NBA chu a hmuhnawm lehzual dawn khawp mai,” a ti.