28 Jan 2020 08:29

bakteaJr.

Mizo tlangval

​Lakers game an sawn hla

Kobe Bryant chuan helicopter chesualah a nunna a chan avangin NBA chuan Los Angeles Lakers game khelh tur chu an sawn hlat sak.

Kan hriat tawh theuh angin Sunday khan kum 20 chhung ngawt Lakers tana khel Kobe chu a fanu Gianna leh midang pasarih nen helicopter chesualah an borala, hemi a nih avang hian Lakers chuan tun karah game an khel rih dawn lo.

Lakers hi LA Clippers hmachhawn tur ni mahse sawn hlat a ni a, an inhmachhawn hun tur hi hriat theih a la ni rih lo.

Kum 41 mi Kobe hian kum 2016 khan basketball khelh a chawlhsana, a career pumpui chu Lakers tana hmang zovin, kum 20 chhung ngawt a khela, NBA champion vawi nga a nih bakaha NBA All-Star ah vawi 18 ngawt thlan a ni bawk.