15 Jan 2020 12:26

bakteaJr.

Mizo tlangval

​Lacazette-Lemar an inthleng maithei

Atletico Madrid chuan an tum anga Edinson Cavani an lalut thei lo a nih chuan Arsenal striker Alexandre Lacazette-a lam an hawi dawn niin chanchinbu mite chuan an tarlang.

Atletico lam hian an winger Thomas Lemar chu chhuah tir dan an ngaihtuah meka, Arsenal-in Lemar hi lakluh an lo tum tawh thin bawk nen Atletico chuan Lacazette-a manah Lemar an tawktarh dawn niin tarlan a ni bawk.

Atletico hian tunah hian Paris Saint-Germain striker Cavani chu lakluh tumin hma an la meka, Atletico chief executive Miguel Angel Gil Marin chuan nimin lam khan Paris khawpuiah PSG president Nasser Al Khelaifi chu hmu in Cavani-a chungchang a sawipui.

Cavani hi tun nipui hian PSG-a a contract a zawh dawn avangin free-agent a ni dawna, mahse Atletico hian tun thlaah Uruguayan striker hi lakluh an duh tawh avangin PSG nen an indawr mek.

PSG hian Cavani hi contract thar ziahpui theih an inbeisei deuh avangin chelh rih an duh niin tarlan a ni bawka, engtin nge thil a awm zel dawn sawithiam a har viau.

Atletico hian Lacazette hi Cavani an lakluh theih loh chauhin an dawr dawn niin a langa, Lemar erawh tun thlasik bazar chhung hian a chhuah ngei a rinawm a ni.