La Liga inkhelah Sunday zan khan Barcelona chuan Valencia an mikhual a, si khat faiin Barcelona hi an chak. Real Madrid chuan Sunday zanlai khan Real Betis an inhnehtawkpui ve thung a, heti hian La Liga-ah Barcelona in point 9 laiin hma an hruai tawh.

Barcelona hian khelh 24 atangin point 62 an hlawhchhuak tawh a, an hnuai chiahah champion lai Real Madrid awmin, Real Madrid hian point 53 an hlawhchhuak ve tawh thung a ni.

Barcelona hian Camp Nou-ah si khat faiin Valencia an lo hneha, goal awmchhun hi 15mins-a lut niin, Sergio Busquets-a ball pek chu Raphinha chuan goal ah a lo tauh lut.

Barcelona hian second half-ah goal khung belhna hun tha tak an nei a, penalty an hlawhchhuak. Valencia player hlui Ferran Torres chuan penalty spot atang hian si ban a pet per a, Barcelona in goal thun belh theihna hun tha an bawhpelh.

A hnu lawkah Ansu Fati pawhin woodwork a pet per ve leh a, darkar khat an khel tling vel chiah tihah Barcelona defender Ronald Araujo chu hnawhchhuah a ni bawk. Araujo hi Hugo Duro laka a professional foul avangin referee in direct red card a pe a ni.

Real Madrid chuan Real Betis an tlawh ve thunga, team hnihte hi goal awm lovin an inhnehtawk a, point insemin, point 1 ve ve an hlawhchhuak.

Real Madrid chuan he inkhelah hian goal an khung zeta, mahse Karim Benzema free kick chuan Antonio Rudiger-a ban a fuh avangin, VAR lama endik a nih hnuah goal hi pawm a ni lo.

Goalkeeper pahnih te, a bikin second half ah an rim angrenga, Betis keeper Claudio Bravo chuan save panga neiin, Benzema leh Vinicius Junior-te chance neih pawh a dan sak. Real Madrid keeper Thibaut Courtois pawhin Juan Miranda leh Ayoze Perez-te chance a save ve bawk a ni.

Barcelona hi kar khat an awl dawna, Sunday leh pek zanlaiah Athletic Bilbao an tlawh dawna, Real Madrid hian tun kar Inrinni zanah Catalan club dang Espanyol an mikhual ve thung dawn a ni.