22 May 2020 05:07

inkhel

La Liga referee 90% in Real Madrid an tan: Referee hlui

La Liga referee hlui Eduardo Iturralde Gonzalez chuan Spain rama football league sang bera match official 90% zette chuan Real Madrid an tan thu sawiin, a dang 10% te chu Barcelona tantute an nih thu a sawi.

Eduardo Iturralde Gonzalez chu 2012 kumah khan a chawl a, a chawlh hmain La Liga game 300 dawn chu a vil hman a. Hetianga referee a nih thin laia a tawn hriat chu tun hnuah a sawi chhuak a ni.

Iturralde chuan, “La Liga match official 90% vel kha chuan Real Madrid an tan thin a, a dang 10% te kha chu Barcelona tantute an ni a. Barca tantute’n an duh emaw, duh lo emaw, Spain ram mipui zinga 70% zet mai kha, Catalonia tel loin Real Madrid tantute an ni,” a ti.

“Tun hnuah chuan Barcelona tantu hi an thahnem zawk tawh mahin a ngaih theih a, tlema thangthar lehzualte hian Pep Guardiola kaihhruaina hnuaia trophy an lak chhoh deuh hnuah khan an tan deuh thup mai niin a hriat ber a. Lionel Messi hun hma kha chuan Spain ram mipui 70% vel zet kha Real Madrid tantu an ni thin,” a ti bawk.

A sawi zelnaah, “Real Madrid leh Barcelona tantu hi an tam viau a nih pawhin ka tan chuan engmah a danglam hran lo a. Tu te pawhin an hriat angin kei chu Athletic Bilbao tantu ka ni a, Athletic hi tan viau mah ila dik taka thil ka tihna tur a nih chuan a tan lo zawng pawhin thutlukna ka siam mai zel a ni,” a ti.

“Referee tam zawk hi chu Real Madrid tantu an ni chiang khawp mai a. Referee kan nih chhan pawh football kan ngaihnat vang a ni a, football ngaina tawh phawt chuan team tan bik an nei lo ngai lo a ni,” tiin a sawi bawk a ni.