French club PSG chuan Barcelona ațangin Neymar lakluh tum mahse harsatna lian tak an tawk zui a, Brazilian forward man hi La Liga lamin an pawm thei lo va an hnawlsak.

Neymar hian Nilani khan Barca hnenah chhuah a duh thu hi a sawi tih Catalan club hian an tarlang a, Barca-a a contract neih mekah leichhuah theihna zat €222m a awm tel.

Spanish media-te tarlan dan chuan La Liga hotute hian UEFA Financial Fair Play (FFP) rules awm mek chu PSG hian an bawhchhia niin an ngai a, UEFA hnenah thlen an rilruk niin an sawi.

Spain-ah hian player-in a contract neihna club a chhuahsan duh anih chuan amah leh amah a in leichhuah a ngai a, La Liga hnenah hian pawisa a thehluh a ngai.

Hetiang kalphungah hi chuan La Liga hnenah Neymar aiawhte'n contract awm laia leichhuah theihna zat sum awm kha an hlan tur a ni a, La Liga hian Barcelona hnenah he sum hi an hlan chhawng veleh ang.

La Liga hian BBC Sport hnenah Neymar aiawhte hi an dawngsawng ngei tih an sawi a, an indawrna erawh a kaltluang lo tih an sawilang bawk.

FFP rules hi 2011-12 season ațang khan hman țan niin European club-te'n uchuak taka sum an hmang tur venna a ni.