Spain rama league sang ber La Liga huangah player tha deuh deuh, khawvel huapa langsar tham eng emaw zat an lo awm tawh a, an la awm mek bawk a. Hetiang player tha deuh deuh fuan khawmnaah hian mi aia khelmuala che fuh thei deuh pawh an awm fo a ni.
La Liga bikah player thenkhat chuan an thiante goal thun tur an siamsak thei viau mai a, chutianga mi goal thun tur siamsak hnem zual thlan chhuahte kan thlir kual ang.
FC Barcelona captain hlui Lionel Messi chu La Liga huanga assist ngah ber a ni a, Ligue 1 club lian Paris Saint-Germain a pan hma khan Spanish league bikah game 520 a khel hman a, mi goal thun tur vawi 193 zet chu a siamsak hman a ni.
Barcelona midfielder hlui Xavi Hernandez kha La Liga huanga assist ngah ber dawttu niin, league game 505 a khelh hman a, mi goal thun tur vawi 117 chu a siamsak hman a. Real Madrid striker Karim Benzema chu pathumnaah awmin, tun thlengin La Liga game 385 a khel tawh a, hengah hian mi goal thun tur vawi 92 a siamsak tawh a ni.
Real Madrid forward hlui, tuna Juventus player ni mek Cristiano Ronaldo chu palinaah a awm a, Portuguese star khan La Liga game 292 khel hmanin mi goal thun tur vawi 88 chu a siamsak hman a. A hnuai chiahah hian Spanish midfielder thin Koke a awm a, La Liga game 356 khelhah mi goal thun tur vawi 78 a siamsak a ni.
Barcelona midfielder hlui Andres Iniesta chu 6-naah a awm a, La Liga game 442 khelhah mi goal thun tur vawi 67 a siamsak a. A hnuai chiahah hian Atletico Madrid striker Luis Suarez a awm a, Uruguay forward hian La Liga game 225 a khel tawh a, hengah hian mi goal thun tur vawi 73 a siamsak tawh a ni.
Pariatnaah Dani Alves a awm a, Brazilian footballer hian Barcelona tan La Liga game 422 a khel hman a, hengah hian mi goal thun tur vawi 67 chu a siamsak hman a. A hnuai chiahah hian Marcelo a awm a, Brazilian defender hian Real Madrid tan La Liga game 374 a khel hman a, mi goal thun tur vawi 63 a siamsak a ni.
Mi goal thun tur siamsak hnem zual thlan chhuah 10 zingah Jesus Navas chu a lang pha chiah a, Spanish footballer hian La Liga game 416 a khel tawh a, hengah hian mi goal thun tur vawi 62 chu a siamsak tawh a ni.
1. Lionel Messi : 193
2. Xavi Hernandez : 117
3. Karim Benzema : 92
4. Cristiano Ronaldo : 88
5. Koke : 78
6. Andres Iniesta : 75
7. Luis Suarez : 73
8. Dani Alves : 67
9. Marcelo : 63
10. Jesus Navas : 62