10 Apr 2019 05:20

inkhel

LA Lakers president Magic Johnson a bang

Magic Johnson chuan engmah sawi lawk lem loin Los Angeles Lakers president a nihna atanga a ban thu a puang thut a. A ban chhan hi nunphung pangngai taka nun ve a duh tawh vang niin a sawi.

President nih a tum tawh loh thu hi Magic Johnson chuan a hmain Lakers neitu Jeanie Buss emaw, general manager Rob Pelinka emaw pawh a hriattir lawk lem lo a. Lakers in tun season chhunga an game hnuhnung ber an khelh hma minute 90 vel a la awm tihin Johnson hian a ban thu hi a puang a ni.

LA Lakers hi Portland Trailblazers nen an inkhel a, Portland hi 104-101 in an chak a, Lakers chuan LeBron James la thar mahse playoff an khel thei ta chuang o a ni.

Johnson chuan, “Nunphung pangngai taka nun ka chak ve tawh a, nuam ti taka hun hman leh theih ka duh a. He hna ka chelh hmaa ka nih thin dan kha nih leh ka duh a. Tunah chuan LeBron James a awm tawh a, kan thil tum chanve kan zo tawh a tih theih a, nipui hunah mi dang an rawn lut leh ang a, he team hian title te chu an beisei thei vat ang,” tiin mittui tla tur dan beh pahin a sawi a ni.

A ban thu a puan hnuah Magic Johnson hian kum thum chhung Lakers lo enkawl tawh, coach Luke Walton chu a ban an ring hlawm hle.

Jeanie Buss leh Magic Johnson te chu Thawhtanni khan darkar thum ngawt mai an inkawm a, hetah hian vawi 16 ngawt mai NBA champion lo ni tawh Lakers kal zel dan tur chungchang te an sawi dun a. Magic Johnson chuan heta an inkawm lai hian ban a tum thu hi engmah a la tihfel loh thu sawiin, Thawhlehni lamah chauh thutlukna hi a siam fel niin a sawi.

“Boss ber hi tu emaw chuan an hrilh mai a ngai dawn a, a lawm lo hle ang tih ka ring nghal a. Hmai chhana hrilh a that rualin chutiang chuan ka ti ngam ngang si lo a ni,” tiin Johnson chuan a sawi a ni.

Lakers inkhel hi Buss chuan a en lo a, mahse halftime laiin Twitter lamah Johnson chungchang hi a tarlang thung a. “Earvin, nang nena thawh dun hi nuam ka ti a, zinkawng thui tak min kalpui a, min tawpsan hnuah kan zinkawng hi kan lo zawh chhunzawm zel dawn nia. Kan hmangaih vek che,” tiin a tarlang.

Team pawhin Johnson an ui thu hi an tarlang ve bawk a, “Earvin Johnson aia Los Angeles Laker ropui an awm lo,” tiin an dah a ni.

A sawi anga nunphung pangngaia nun a duhna chauh hi Magic Johnson ban chhan a ni bik lo a, NBA in an chhui zui reng mai te, an veh reng mai te leh pawisa an chawitir fo mai chu ninawm a tih tawh thu a sawi chhuak a ni.

Kumin August thla hian Johnson chuan kum 60 a tling tawh dawn a, sumdawnna lamah a inhmang nasa hle a, Los Angeles Dodgers leh Los Angeles FC lamah neitu nihna chanpual a nei ve ve a ni.

Lansing, Michigan atanga chawr chhuak point guard hian Michigan State ah NCAA championship title a la a, hemi hnu hian NBA title vawi nga lain, kum 12 a inkhelh chhungin league MVP award vawi thum a dawng bawk a ni.

1991 khan Johnson hi HIV hrik pai a ni tih finfiah a ni a, hei vang hian inkhelh a chawlhsan phah a. Mahse, a hnuah Lakers chu player leh coach ni kawp turin a zawm leh a ni. Johnson chuan a hriselna chu a tha pangngai niin a sawi a, a mawhphurhna chelh lai a chawlhsan chhan hi a hriselna vang a nih loh thu a sawi a ni.