13 Sep 2020 03:49

inkhel

LA Lakers in Western Conference final an lut

LeBron James chuan Los Angeles Lakers a chakpui a, kum 10 hnua a vawi khatna atan NBA Western Conference final an lut.

NBA Western Conference semi final an khelhah Los Angeles Lakers chuan 119-96 in Houston Rockets an hneh a, semi final best-of-seven series-ah 4-1 in an chak a. Kobe Bryant hoa 2010 NBA championship hnua NBA final an luh leh hmasak ber a ni.

He inkhelah hian LeBron James chuan point 29 a thun a, rebound 11 a lak bakah assist 7 a nei bawk a. Orlando, Florida ah hian Anthony Davis chuan point 13 a thun bakah rebound 11 a la a, Kyle Kuzma pawhin point 17 a thun a, Markieff Morris chuan point 16 a thun bawk a ni.

Final-ah hian Los Angeles Clippers leh Denver Nuggets inkhela chak zawk an hmachhawn dawn a, tun dinhmunah Clippers chuan 3-2 in hma an hruai mek a ni.

Houston Rockets tan hian James Harden chu a che tha ber a, he inkhelah hian point 30 a thun a, Russell Westbrook chuan point 10 chauh a thun thei a. An inkhelah hian Rockets chu a tir atanga hlauhawm lo zawk an ni nghal a, a tawp thlengin a umtu an ni chho deuh char char a ni.

James chuan NBA huangah final vawi 11 a lut ta chiah a, “He team ka zawm chhan ber chu hetiang dinhmuna dinpui ka duh vang hi a ni a. A nihna takah chuan a hmaa an lo awm tawhna thin, dinhmun sang taka din leh hi an phu a, title lak theih ngei hi a pawimawh ber a ni,” a ti.

“Game tinah kan inzir belh zel a, kum tinin a hma aia tha zawk nih kan tum thar zel dawn a, hma pawh sawn belh zel hi ka tum ber tur chu a ni a. He team tana ka khel thei hi lawmawm ka ti a, kan team tantute tan inkhel hmuhnawm leh tha tak entir zel kan tum ang,” a ti bawk.