Kawhi Leonard chuan Los Angeles Clippers a zawm fel niin an sawi.

Leonard chuan season hman zawh takah Toronto Raptors chu a vawi khatna atan NBA title a lakpui a, Finals MVP atan an thlang zui bawk a. Hemi hnuah hian mual dang hrut a rilruk a, Raptors chu chhuahsanin LA Clippers lam hi a pan ta a ni.

Kum 28-a upa Leonard leh Clippers hi an inbe fel vek tawh a, contract pawh an ziak fel tawh niin an sawi a. Season thar tan hunah chuan Clippers tan a khel chho tawh ang.

ESPN chuan Oklahoma City Thunder star Paul George pawhin Kawhi Leonard hi a zui ang a, LA Clippers a zawm ve dawn niin an tarlang a. Hei hi a taka a thleng ta a nih chuan Los Angeles Lakers nen an tawrhhlelhawm viau tura ngaih an ni a, Lakers hian LeBron James leh Anthony Davis te an nei bawk a ni.

Kawhi Leonard hian 2018-19 season chhung khan game 22 ngawt mai a khel thei lo a. 2016-17 season-ah Spurs player a nih lai khan a inhliam ngun deuh a, hei vang hian Spurs pawhin rim takin an chhawr loh phah a, a hnuah San Antonio chu a chhuahsan zui a ni.

2018-19 regular season chhungin Kawhi hi vawi 60 a inlan a, hengah hian game tina a average chu 26.6 points leh 7.3 rebounds a la ni tho a. Toronto chu Eastern Conference-ah pahnihna a nihpui a, 58-24 record an nei a ni.

Postseason chhungin Leonard hi a che tha lehzual a, a average chu 30.5 points leh 9.1 rebounds a ni a. Raptors chu a vawi khatna atan NBA title a lakpui a, Eastern Conference semi final Game 7-ah buzzer rik rualin point a score a, Philadelphia 76ers an hneh phah a, hei hian sawi a hlawh hle.

Vawi hnih ngawt Defensive Player of the Year atana an lo thlan tawh, All-Star ah pawh vawi thum tel tawh Kawhi Leonard hian Finals MVP award pahnih a dawng tawh a ni.