Rafael Nadal chuan Nick Kyrgios chu Acapulco-ah a hneh zo lo a, Kyrgios hian Mexico Open quarter final a thleng a ni.
Australian Nick Kyrgios leh top seed Rafael Nadal te chu Mexico Open pre-quarter final-ah hian an inkhel a. Set hmasa ber chu Kyrgios hian a hloh a, a nuamsam vak lo niin trainer te bulah a sawi nghe nghe a. Mahse, a hnuah a insang mar chho a, Grand Slam title 17 ngawt la tawh Nadal chu a hneh thei a ni.
Spanish superstar Nadal chu Acapulco-ah hian 2005 leh 2013 ah te a lo champion tawh a, Australian Open final-a Novak Djokovic a hneh loh hnua a inkhelh leh hmasak ber a ni.
Nadal hian set khatna chu 6-3 in a la thei nghal a, set hnihna leh set thumnaah tiebreaker an khel ve ve a, hengah hian a chak thei ta lo ve ve a. Heng set hnihah hian Nadal chuan Kyrgios break theihna hun tha a nei ve ve a, a hmang tangkai thei ta lo ve ve thung.
Pre-quarter final an khelhah hian a tawpah Nick Kyrgios chuan 3-6, 7-6 (7/2), 7-6 (8/6) in Rafael Nadal chu a hneh thei ta a ni.
World No. 72 Kyrgios leh Nadal te hi a hmain vawi 5 an lo intawng tawh a, hengah hian Nadal chu vawi thum chak tawhin Kyrgios hi vawi hnih a chak ve thung a, tun tuma a chak ve leh tak avang hian head-to-head ah chuan 3-3 a ni ta chiah a ni.
Quarter final-ah hian Nick Kyrgios chuan Grand Slam champion vawi thum lo ni tawh Stan Wawrinka a hmachhawn leh dawn a, semi final lut thei zawk nih tumin an inbei ang.
Third seed Stan Wawrinka hi third seed niin, American Steve Johnson nen pre-quarter final-ah an inkhel a, Wawrinka hi 7-6 (7/5), 6-4 a chakin quarter final hi a thleng chho a ni.
Hmeichhe top seed Sloane Stephens zinkawng pawh Nilaini khan a tawp a, Brazilian qualifier Beatriz Haddad Maia nen inkhelin Beatriz Haddad Maia hi 6-3, 6-3 in a chak a. Haddad Maia hian Top 10 player vawi sarih a hmachhawn tawh a, tun tum hi chak zawk a nih hmasak ber a ni.
Kum 22-a upa Maia hian Chinese player Want Yafan chu a hmachhawn leh dawn a. Want Yafan hi Puerto Rican star Monica Puig nen inkhelin, Yafan hian 4-1 a hma a hruai laiin Monica hi a inhliam a, inkhel an titawp a, Want Yafan chu chaka puan a ni.
World No. 1 hlui, Belarus star Victoria Azarenka chuan Tatjana Maria chu 6-2, 6-1 in a hneh a, quarter final a lut bawk a ni.