12 Oct 2020 07:57

bakteaJr.

Mizo tlangval

​Kuminah Wilder ka hnek lovang: Fury

British heavyweight boxer WBC world champion ni lai Tyson Fury chuan, Deontay Wilder nena an inhnek tur chu an sawn zin em avangin a kalsan tawh thu a sawi.

Kum 2018 khan Fury leh Wilder te hi an lo inhnehtawk tawha, kumin February thla khan Fury hian awlsam takin Wilder hi a hneha, a WBC world heavyweight title kawl lai a chhuhsak.

A vawi thum khan Fury leh Wilder te hi July thla khan inhmachhawn tur ni mahse, COVID-19 avangin sawn a ni a, tunah pawh sawn leh an tum avangin kuminah Fury hian midang hmachhawn a tum niin a lang.

Fury chuan, “December thla 19 kha ka remti vek tawha, mahse nakkum lamah sawn leh an tum. Training ka nei renga, ka inpeiha, December ni 19 atanga nakkum lama sawn an tum leh hnu kha chuan ka peih tawh lova, ka kalsan ta a ni.

“Khawvela fighter tha ber ka ni a, kum 2021 ral hma ngei hian khawvelah heavyweight championship belt awm zawng zawng ka kawl ang,” a ti.

Fury hian Twitter lamah UK-a a haw tur thu a sawi tawha, December thlaah Wilder nilo midang a hmachhawn ngei dawnin a lang.

Wilder hian a tumpui leh tur a hneha, Anthony Joshua-a’n Kubrat Pulev a hneh bawk chuan, nakkumah Fury leh Anthony Joshua te hi undisputed heavyweight champion zawng turin an inhnek ngei a rinawm a ni.