Maria Sharapova chu a inhliam avangin 2018 chhunga tournament hnuhnung pathumah a tel thei dawn lo a ni tih WTA chuan an sawi.

Tun season chhungin Sharapova hi a tluang lo hle a, a duh angin a che hleithei meuh lo a ni ber a. Season tawp lamah phei chuan a lo ruahman lawk aia hmain a chawlh a ngai ta hial a, season kharna tur tournament pathumah chuan a tel thei dawn ta lo a ni.

Vawi 5 ngawt grand slam champion lo ni tawh Maria hi 2016 Australian Open-ah khan damdawi hman phal loh a hman avangin thla 15 zet mai inkhel thei loin an hrem a. An hremna a zawh hnu hian a inkhelh chhunzawm leh a, mahse beisei a pha ta lo hle.

2017 Stuttgart Open-ah khan Maria Sharapova hi telin WTA Tour ah a tel chho ve leh tan a, hemi hnu atang hian tournament pakhatah chauh a la champion a, nikum October thla khan Tianjin Open title a la a ni.

Kumin French Open quarter final a thleng a, a khingpui Garbine Muguruza chu quarter final-ah hian a hneh zo ta lo a ni.

Sharapova hi hemi hnuah tournament pathumah chauh a la tel a, Wimbledon, Rogers Cup leh US Open ah chauh a tel thei a. Tun hnai khan WTA chuan thuchhuah siamin kum 31-a upa Maria Sharapova hian tun season atan chuan a duhtawk tawh thu sawiin, 2019 atan inbuatsaih a tum niin an sawi.

Kumin chhunga tournament-a tel a tum tawh loh takah chuan Sharapova hi China Open leh Kremlin Open-ah a tel dawn lo tihna a ni a, Tianjin Open title a kawl mek pawh a humhim dawn lo tihna a ni.

Maria Sharapova chuan, “Tianjin Open-a let leh a ka title kawl lai humhim ka tum viau a, mahse ka hliam dam famkim tur chuan hun ka la duh si a, hei vang hian ka tel thei dawn ta lo a, pawi ka ti hle,” a ti a.

“Kuminah Tianjin lama ka khel thei lo tur hi hrehawm ka ti a, nakin zelah chuan ka tel chhunzawm theih zel ka beisei a ni,” a ti bawk.