Argentina captain Lionel Messi chuan friendly match an khelh leh tur pali chu a khel ve dawn lo niin an sawi a, ram tana a khelh zel dawn leh dawn loh a chiang thei rih lo.

Vawi nga ngawt Ballon d’Or lo dawng tawh Lionel Messi hian 2016 Copa America final-a Chile an hneh loh khan ram tana khelh a tum tawh loh thu a sawi a, mahse a chawlh hi a sut leh a, kumin World Cup-ah an ram chu a telpui leh a ni.

September 7 hian Argentina chuan Los Angeles khawpuiah Guatemala an hmachhawn dawn a, September 11 ah New York khawpuiah Colombia nen an inkhel dawn bawk a. Kuminah hei lo hi friendly match dang vawi hnih an la khel leh dawn bawk a. Heng inkhel an hmachhawn turah hian Lionel Messi chuan khelh a tum lo vek a. A bak pawh a khelh zel dawn leh dawn loh sawi chian theih a awm lo a ni.

Argentina rama ni tin chanchinbu lar Clarin chuan, “Messi chu kumin chhungin a rawn kir dawn rih lo a, a hma hun zel tur sawi chian theih a awm rih lo a ni,” tiin an tarlang.

News website Infobae chuan Messi chu a la chawlh hahdam tur thu an tarlang a, tuna a khelh dawn loh avang hian ram tana khelh a tum tawh lo tihna a nih loh thu an tarlang bawk.

AFP hnenah team thupuangtu chuan, “Messi chawlh hun a thleng dawn a nih chuan coach in a la sawi mai ang a, Messi chungchanga thu awm ang ang chu coach bak sawi chiang tur an awm lo,” a ti.

FIFA World Cup-a an chet that loh em avangin Argentina coach Jorge Sampaoli chu a bang a, a aiawh lailawk turin Lionel Scaloni an ruat a. Scaloni hian United States lama kal tur squad hi tun kar chhungin a puang dawn a ni.

Carlos Tevez chuan, “Mimal thil a ni a, Leo hian ngun takin ngaihtuah se, chutiang tur chuan hun a la duh deuh ang. A dinhmun hi ka hrethiam khawp mai a, ram tan a rawn khel dawn tawh lo a nih pawhin kei chuan ka hriatthiampui thlap a. Ram tan theihtawp an chhuah a, an chet that pawhin, an chet chhiat pawhin kan sawisel vek a. A dinhmun angah hian ka lo ding tawh a, chu vangin kei chuan a rilru put dan tur pawh ka hrethiam nghal a ni,” a ti.