17 Sep 2020 10:24

bakteaJr.

Mizo tlangval

Kuminah Mayweather vs Logan Paul?

Boxing legend Floyed Mayweather chu, Youtube star Logan Paul hmachhawn turin boxing khawela zuan luh leh a tum niin chanchinbu mite chuan an tarlang.

Kum 43 mi Mayweather hian boxing khelh chawlhsan tawh mahse, exhibition match khel turin a rawn kir dawn niin sawi a tam chho ta hle a, thudik an ni ngei pawhin a lang chho mek.

American boxer Mayweather hian kum 2015 khan boxing khelh chawlhsan mahse, kum 2017 khan MMA fighter lar Conor Mcgregor hmachhawn turin a rawn kir leha, hemi hnu hian kum 2018 kumtawpah Japanese boxer Tenshin Nasukawa chu exhibition match-ah a hneh leh bawka, hemi hnu hian an la inhnek leh lo.

Youtuber dang Keemstar chuan kuminah Mayweather leh Logan Paul te an inhnek tur thu a dawng tih a sawi chhuaka, media lam pawhin an thlawp zui ve nghal mek.

Kum 25 mi Paul hian boxing-ah professional fight vawi khat chiah a la nei a, kum 2019 khan Youtube star dang KSI nen an inhmachhawna, he fight-ah hian Paul hi split decision hmangin a chak lo. KSI leh Paul te hi a hmain vawi khat lo inhnek tawh bawk mahse, an fight hmasa zawk erawh professional fight-a chhiar a ni lo.

Paul hian nikum November thla kha social media lamah Mayweather ko chhuakin, inhnekpui a duh thu a sawia, hneh loh la nei lo Mayweather leh hneh la nei lo Logan Paul-te inhnek chu kuminah kan hmu dawn niin a lang chho ta hle a ni.