Manny Pacquiao chuan kumin chhungin hun awl a nei tawh dawn rih lo tih sawiin, Amir Khan nen inhnek thei tur anga thawm awm chu thil beiseiawm a nih loh thu a sawi.

Kum 40-a upa Manny Pacquiao chuan Las Vegas khawpuiah Keith Thurman hnehin WBA welterweight title a la a. MGM Grand-ah split decision-a Thurman a hneh khan khawvela welterweight champion ni thei upa ber a ni.

Kar hmasaah khan Amir Khan chuan kumin November 8 khian Riyadh, Saudi Arabia ah Pacman nen inhnek turin contract an ziak vek tawh niin a sawi a. Hemi chungchang hi Pacquiao chuan a chak hnuah sawi chhuakin, kuminah chuan boxing ring chhunga chetna hun a neih tawh loh thu a sawi chhuak.

Kumin January thlaah khan Pacquiao hian Adrien Broner chu a lo hneh tawh bawk a, 2008 hnuah Philippines senator hi kum khat chhungin boxing ring-ah vawi thum a lut leh miah lo a ni.

Pacquiao chuan, “Ka rin dan chuan ka inhnek leh theih hmasak ber chu kum thar lam a ni tawh ang a. Ka buai ve em mai a, boxing ring luhchilh reng thei ka ni bik tlat lo,” a ti.

“Tuna ka tih hmasak ber tur chu Philippines lamah ka kir leh ang a, Senate-ah hna ka thawh leh char char a ngai tawh a ni,” a ti bawk.

Pacman hian kumin September thlaa Los Angeles khawpuia Errol Spence Jr leh Shawn Porter te’n welterweight world unification fight an neih hunah kal ve ngei a tum thu a sawi a ni.

British boxer Amir Khan chuan kumin April thlaah khan Terence Crawford a hneh lo a. Kar hmasaah khan Billy Dib chu Jeddah khawpuiah hnehin WBC international welterweight title a la a ni.

Bill Dib nen an inhnek hnuah Amir Khan chuan, “Ka inhnek leh hmasak ber tur chu kumin November 8 hian a ni ang a, Saudi Arabia-ah bawk ka kir leh ang a, Riyadh khawpuiah boxing ring hi ka luhchilh leh ang,” a ti a.

“Duhthusamah chuan Manny Pacquiao nen a nih ngei ka beisei a, kan pahniha kan inhnek ngei theih nan contract pawh kan ziak fel vek tawh a. Kan inhnek theih nan Keith Thurman pawh hi a hneh ngei ka beisei hle,” a ti bawk.