Real Madrid leh France midfielder Eduardo Camavinga chu France tana a fehchhuahnaah knee ligament injury a neih avangin kuminah a inkhel thei tawh dawn lo.

Camavinga hi France tana Euro 2024 qualifier khel turin a fehchhuak mek a, mahse Nilaini han training-naah Ousmane Dembele nen an insut avangin a khup a ti na a, thla hnih vel a chawlh a ngai dawn niin a lang.

Kumin kum 21 mi hi a inkhel thei tawh dawn lova, a chawlh hun chhung tur hi chiang taka sawi la awm lo mahse nakkum January thlaah a rawn kir theih a beiseiawm viau niin chanchinbu mite chuan an ziak.

Tun season-ah French midfielder hi Real Madrid player pawimawh tak a ni a, La Liga-a Real Madrid game khelh tawh zawng zawngah a la inlan vek a, a inkhel thei lo tur hi Real Madrid tan a pawi thui viau maithei.

Real Madrid player pawimawh tak tak ten khup hliam an nei thei hle a, an goalkeeper Thibaut Courtois pawh ACL injury avangin tun season-ah a inkhelh theih a rinawm tawh lova, an defender Eder Militao pawh ACL injury avangin season tawp lamah bak a inkhelh theih a rinawm tawh loh bawk.

Real Madrid player lakluh thar Arda Guler pawh a khup hliam avangin a la chawl mek a, Ningani khan Vinicius Junior pawh Brazil tana a fehchhuahnaah a malpui hliam avangin Columbia laka lak chhuah a lo ni tawh a ni.