Kuminah $80 million ka hai lut dawn: Mayweather

16th February 2019, 08:02PM

Floyd Mayweather chuan kumin chhungin exhibition atang ringawtin $80 million hai luh a tum thu a sawi.

Boxer ropui Floyd Mayweather chuan nikum kum tawpah Japan ramah hun reilote chhungin pawisa tam tham tak mai a hlawh a. Japanese kickboxer Tenshin Nasukawa nen kum hlui thlah ni khan an inhmachhawn a, minute 2 chhung lekin Mayweather hi a chak a, $9 million zet mai a hlawh der a ni.

Kum 41-a upa Mayweather hian kumin chhungin exhibition match neih leh nual a tum thu sawiin, Japan ramah pawh a nei leh dawn niin a sawi a. July thla hian Japan ramah chuan kal leh a tum thu sawiin, kumin chhunga exhibition match atanga sum lak luh a beisei zat chu $80 million a nih thu a sawi a ni.

Mayweather chuan, “Boxing chungchang sawi vak ka tum lo a, mahse min ngaisangtute’n hriat an chak em avangin ka hun hman dan tur tlem chu ka sawi dawn a. Kuminah exhibition match ka khel leh nual ang a, heng atang hian $80 million vel hmuh theih ka inbeisei,” a ti.

“Ka nun ka hmang a, nuam ti takin hun ka hmang zel a, ka thil ei lah chu a tui em em bawk a. Pawisa ka dahtha a, ka peipung zel bawk a, engmah hian min dang thei lo a ni ber e,” a ti bawk.

A sawi zelnaah, “July thla hian Japan ramah ka kal leh ang a, exhibition match ka khel leh dawn a. Competitive boxing tih leh kher hi ka tan a tul tawh lo a, a tak taka tih hi ka rilruah a awm vak tawh lo a, keimah hi a tak tak chu ka ni mai a. Ka tha a ni tih hi khawvel hriatah ka lantir tawh a, thluak hman thiam hi a pawimawh a ni,” a ti.

A hma daih atang tawhin Mayweather hian a sum neih zia puanzar hi nuam a ti thei hle a, Instagram velah a hausakna pho lan a uar viau reng a. August 2017 a Conor McGregro nen an inbeih khan $80 million (£78 million) zet mai a hlawh a, sum siam kawngah chuan a ngaihtuahawm loh viau a ni.

Copyright © inkhel.com 2024. All rights reserved.