28 Oct 2019 05:22

inkhel

Kumin chhungin No. 1 nih leh ka tum: Nadal

Rafael Nadal chuan World No. 1 nih leh theih chu duhthusam a nih thu sawiin, kumin chhungin chutiang dinhmuna din leh theih chu a tum thu a sawi.

Pathianniah khan Rafael Nadal chuan, “No. 2 nih ai chuan No. 1 nih ngei hi a chakawm bakah a duhawm zawk bawk a. Kumin chhung ngeia No. 1 nih leh theih hi ka tum a, No. 1 ni chunga kumin thlah liam theih hi ka duh ber a ni,” a ti.

Kum 33-a upa Nadal hian kumin chu No. 1 ni chunga a thlah liam a nih chuan ranking-a dinhmun sang ber luah chunga kum a hman zawh vawi 5-na a ni tawh dawn a. Hetiang zat lo puitlin tawh Novak Djokovic, Roger Federer leh Jimmy Connors te huangah a awm ve thei dawn dawn a ni.

Tun dinhmunah Serbian star Novak Djokovic chu No. 1 a la ni mek a, Spanish star Nadal hi No. 2 niin, an inkar pawh a zau vak lo hle a. Kumin kum tawp hmain Nadal hian Djokovic hi a la lehpel ve thei reng a ni.

“US Open zawh hnuah khan ka kut a na ve deuh a, kha vang khan Laver Cup velah pawh ka duh angin ka che tha thei lo nghe nghe a. Khami hnuah khan hun eng emaw chen chu ka chawl a, tunah chuan 100% a khel thei turin ka rawn kir leh tawh a, chutiang taka chet theih pawh chu ka inbeisei,” tiin Nadal chuan a sawi.

A sawi ang deuh hian kumin September thlaah khan Rafael Nadal hian US Open title a la a, title lian tham 19 a lakna chiah niin, hemi hnua inelna pangngai deuha a tel lehna chu Laver Cup-ah khan a ni a. October 19 ah khan Nadal leh kum 14 zet a lo kawp tawh Xisca Perello te chu Mallorca khuaa castle pakhatah an innei a ni.

Nadal hi Bercy-ah a la champion miah lo a, heti chung hian Paris khawpui chu a tan vanduaina a ni tih a pawm duh lo thung.

“Roland Garros-ah vawi 12 ngawt ka champion tawh a, hei hi vanduaina chu a ni lo chiang a. Paris-ah hian ka vanduai thin vanga Bercy-ah hian la champion lo chu ka ni thei lo hrim hrim,” a ti.

Spanish star Nadal hian kuminah 48-6 record a nei mek a, tun hnaia a match 29 khelhah vawi 28 ngawt mai a chak thei bawk a. A chak loh hnuhnun ber chu Wimbledon semi final-ah niin, hetah hian Roger Federer chu a hneh lo a ni.