Jurgen Klopp chuan transfer window inhawn laiin player lei thar lem lo mahse a squad neih saah chuan a lungawi tawk tih sawiin, kum tin pawisa tam deuh hman ziah theih a nih loh thu a sawi.
Liverpool chuan kumin nipui transfer window inhawng mekah player pakhat chauh an la seng lut a. Kum 17-a upa Dutch defender Sepp van den Berg tih loh chu lei thar an nei lem lo a. Manager Klopp chuan a dang an lak belh vak a rin loh thu a sawi a ni.
Klopp chuan, “Player lei vak kan tum hran lo a, hahdam takin kan awm der der a ni ber a. Eng thil nge thleng zel dawn tih chu hunin a la rawn hril chawp zel mai ang,” a ti.
“Tun tuma transfer window inhawng mek hi Liverpool FC tan chuan sum hman tam loh tum a ni dawn a. Kum hnih kalta chhung khan he team tan hian sum tam tak kan hmang a, khatiang reng khan kum tin pawisa hman theih a ni lo,” a ti bawk.
A sawi zelnaah, “Mi tam zawk chuan pawisa hmang tam club hi an ngaisang viau zel niin a hriat a. £300 million tih vel te, £200 million tih vel hmang thei chu an ngai ropui em em a ni ber a. Hetiang ti thei hi khawvel club hrang hrang zingah pahnih emaw vel chiah an awm a, tun dinhmunah chuan Barcelona leh Real Madrid te chauh an nih hmel a. Kum dangah chuan Manchester City leh Paris Saint-Germain te pawhin an la ti ve thei mahna,” a ti.
German coach chuan, “Keini chu inlei belh vak lo mah ila kan zia viau tho a. Kan team neihah hian ka lung a awi khawp mai a, kan hlim viau a. Position pakhata khel turte chu kan la melh maithei a, kan hmu ta lo a nih pawhin a pawi chuang lo ang a. Kan player neih sa hi tangkai lehzuala hman a pawimawh ber a ni,” tiin a sawi.
“Season tan vat vat ka chak tawh a, a phurawm leh dawn viau a ni,” tiin Jurgen Klopp chuan a sawi.
European champion te hi season thar atan an inpuahchah chho mek a, Inrinni hian Klopp-a team hlui Borussia Dortmund nen Indiana-ah an inkhel dawn a. Mohamed Salah, Roberto Firmino leh Alisson Becker te pawhin Liverpool camp an zawm ve thei dawn hnai tawh a ni.
Liverpool transfer
IN
Sepp van den Berg (PEC Zwolle, £4.4m)
OUT
Danny Ings (Southampton, £20m)
Rafa Camacho (Sporting Lisbon, £7m)
Alberto Moreno (Villarreal, free)
Daniel Sturridge (released)
Adam Bogdan (released)
Connor Randall (released)
Marko Grujic (Hertha Berlin, £2m - loan)
Sheyi Ojo (Rangers, loan)