03 Dec 2019 01:41

inkhel

Kum tharah Ballon d’Or dawn ka tum: Sadio Mane

Sadio Mane chuan kum tharah chuan Ballon d’Or dawn a tum ve tawh tur thu a sawi chhuak.

Liverpool winger Sadio Mane chu kumina Ballon d’Or dawng thei tura chhawp chhuah zingah telin, a pumpuiah palina a ni thei a. Lionel Messi, Virgil van Dijk leh Cristiano Ronaldo te chu a tluk ta lo a ni.

Kum 27-a upa Sadio Mane chuan kuminah chawimawina sang chu dawng thei ta lo mah se, kum thar lamah chuan dawn theih ngei a tum dawn tih a sawi.

Mane chuan, “Nilainiah game khelh tur a awm avangin Ballon d’Or semnaah ka tel ve thei ta lo a, ngaihdam ka dil a. Chutih rualin, he chawimawina dawngtu Lionel Messi ka lawmpui hle a. Kum tharah chuan he chawimawina hi dawn ve ngei tawh ka tum dawn a ni,” a ti.

Tun hnaiah Mane hi a che tha chho hle a, 2018-19 season chhung khan league goal 22 ngawt mai a thun thei a, season tluanin Liverpool chuan vawi khat chiah chak loh an nei a. Premier League champion Manchester City chu point 1 in an um pha ta lo a ni.

Season kal mekah Senegal winger Mane hi a che tha chho viau bawk a, tun thlengin league game 14 khelh tawhah goal 8 a thun tawh a, mi goal thun tur vawi 4 a siamsak tawh bawk a ni.

Ballon d’Or chawimawina an semnaah hian Mane teammate Mohamed Salah chu pangana niin, Paris Saint-Germain thiampuipa Kylian Mbappe chu parukna a ni a. Liverpool goalkeeper Alisson Becker chu pasarihnaah a awm a, Bayern Munich striker Robert Lewandowski chu pariatna a ni a. Pakuanaah Manchester City star Bernardo Silva awmin, sawmnaah Manchester City player tho Riyad Mahrez a awm bawk a ni.