Mauricio Pochettino chuan kum nga kaltaa Tottenham Hotspur a enkawl tan tirh ang vel kha tunah hian an nih leh thu sawiin, tlema pangngai leh tur chuan hun an la duh deuh thu a sawi.

Tottenham Hotspur chu tun season kal tawhah an che fuh lo chho hle a, Premier League game 11 an khelh tawhah vawi 3 chiah an la chak thei a, a chungnung 10 zingah pawh an lang pha rih lo a ni.

Chak hmel hmu thei lo viau mah se UEFA Champions League an khelh tawhah vawi hnih an chak ve thei thung a, hei hian an hming mawi lo lutuk tur chu eng emaw chen a hliah khuh ve thei a ni.

Pochettino chuan, “Kum nga kaltaa kan awm ang velah khan kan kir leh a ni ber a. Kan dinhmun te, kan awm mekna te leh thil dang hrang hrangah khatiang hun laia kan dinhmun nen khan a inang khawp mai a, hun hi kan la mamawh belh deuh a ni,” a ti.

“Hmanhmawh tak leh chak takin club hi hma kan sawnpui thei lo a, hun hi kan kal chaktir thei hek lo a, chu chu kan buaina lian ber chu a ni mek a. Kan kal bek bek hi thil nih dan tur dik tak pawh a ni a, dawhtheihna kan neih that a pawimawh khawp mai,” a ti bawk.

A sawi zelnaah, “Dawhtheihna nen theihtawp kan chhuah ang a, rim takin hma kan la chho zel ang a, kan nih dan phung chu a danglam ve tial tial mai dawn a. Kawng tam takah kum nga kalta nen khan inang lo viau mah se kawng hrang hrangah inanna erawh a nei ve tlat a ni,” a ti.

“Tunah hi chuan thil sawi vak vak hi ka duh lo a, sawi duah pawh a harsa rih hle a, thil ni lo deuh hlek kan sawi chhuak ang tih ka hlau a. Thil a kal fuh leh a nih chuan chutiang hunah chuan chiang zawkin engkim kan la sawi dawn ania,” tiin Pochettino chuan a sawi.

Tun dinhmunah beisei pha lo viau mah se Mauricio Pochettino chuan Spurs chu Premier League club chungnung pali zinga tel lo tura ngaih ngawt chi an nih bik loh thu a sawi a ni.