26 May 2019 12:45

bakteaJr.

Mizo tlangval

​Kum li hnua French Open khel tur Federer

Roger Federer chu kumin French Open-ah a inlan dawn a, kum li hnuah a vawi khat nan Roland Garros-a a inlan leh vawi khatna a ni dawn a, Federer hian vawiin (26/05/2019) tlai hian Italian player Lorenzo Sonego a hmachhawn ang.

Grand Slam 20 lai la tawh Federer hian French Open hi vawi khat bak a la la lova, clay-court ah hian Rafael Nadal a ngam lo hle.

‘Clay Lalpa’ an tih mai Nadal pawh Roland Garros-ah hian a inlan dawn a, ani hi French Open-a champion hnem ber niin vawi 11 ngawt a champion tawh.

Novak Djokovic pawh a inlan dawn a, ani pawh hian Federer ang tho in French Open hi vawi khat bak a la la lo.

Tennis chanchina player ropui ber pathuma chhal ngam Federer, Nadal leh Djokovic-te chu French Open-ah hian an inlan vek dawn a, anni pathum zinga pakhat hi champion tura ngaih an ni bawk a, Nadal chu an zingah hian rinkai ber a tih loh theih loh.

Kar liamta mai khan Italian Open (clay-court) –ah Nadal hi a champion a, Djokovic chu 6-0, 4-6, 6-1 a hnehin, kumina a title hmasa ber a lo la tawh a, French Open-ah pawh a lakah beisei a sang hle a ni.