20 Feb 2019 04:58

inkhel

​Kum hnih hnua clay court-a khel tur Federer

Tennis khawvela player ropui ber Roger Federer chuan kum hnih chhung clay court-a a khelh tawh loh hnuah, Madrid Open khelh a tum thu a sawi.

Grand Slam vawi 20 la thei awmchhun Federer hian kuminah Australian Open bak a la khel lova, Australian Open-ah hian round of 16-ah Greek mi Stefanos Tsitsipas hneh lovin a tla.

Clay court inelna ropui ber French Open-ah Federer hi vawikhat chiah a la champion a, kum 2009 daih tawh kha a ni. Madrid Open hi clay niin, kuminah Federer chu inlan a tum hle a, Rafael Nadal tih lovah chuan Caja Magica (Madrid Open)-a hlawhtling ber niin, kum 2006, 2009 leh 2012-te khan a lo champion tawh.

Madrid Open director Feliciano Lopez chuan thuchhuah siamin, “Federer hi tennis chanchina player ropui ber pakhat a ni tih hi zep rual a ni lo. Madrid-a a khel tur hi kan lawm em em a, kan tan chuan lawmman dawn ang a ni a, chuzawng ai chuan fans-ten he player danglam tak hi Caja Magica-ah an hmu thei tur hi a lawmawm hle a ni. Swiss player bakah Djokovic leh Nadal-te kan hmu thei tur hi en loh phal chi a ni lo,” a ti.

Madrid Open hi kumin May thla ni 3 atanga ni 12 thleng khelh tur a ni a, Lopez sawi ang hian Federer bakah world no.1 ni mek Novak Djokovic leh French Open title vawi 11 la thei; 'Clay Lalpa' an tih mai Rafael Nadal-te an inlan thei dawn niin a lang a ni.