Manny Pacquiao chuan Inrinni hian Adrien Broner chu Las Vegas khawpuiah a hmachhawn dawn a, Pacquiao hi kum 40 a ni tawh a, upa tawh hle mahse a taksa a la chak that thu sawiin, kum chu number ve mai a nih thu a sawi.
Filipino boxer Manny Pacquiao chuan weight 4 ngawt maia world champion lo ni tawh Adrien Broner lakah WBA world welterweight title a kawl mek chu hum a tum dawn a. Kum 40 a tlin hnua a inhnek leh hmasak ber tur a nih bakah boxing a luhchilh hnua professional fight a neih vawi 70-na chiah a ni bawk ang.
Pacquiao chuan, “Kum 40 ka tlin hnua ka vawi khat inhnekna tur chiah a ni a, ka tan chuan chona thar a ni nghal hrim hrim a. Ka kum chu tam ve tawh mahse ka taksa a la fit that avangin kum hi number ve mai a ni tih hi mi hmuhah ka tih fiah a ngai a ni,” a ti.
“Kum chu engzat pawh lo ni se awmzia a awm tak tak lo a, a pawimawh ber zawk chu ka inpuahchah that dan te leh ka thawhrimna te hi a ni,” a ti bawk.
Manny ‘Pacman’ Pacquiao hian boxing a luhchilh tan tirh chuan an chhungkaw khawsak a harsa thei hle a, a nuin an chhungkua a enkawl theihna turin vawi khat inhnekah $2 vel lek te a hlawh chho tan a. A beidawng duh mai lo a, a kal zel a, world champion te a nih mai piah lamah tunah phei chuan an ramah senator te a ni hial tawh a ni.
American boxer Adrien Broner hi pawn lama chanchin ngah zet mai a ni a, December thla khan dan kalha lirthei a khalh vel avangin an man nghe nghe a. Hemi bakah hian thuneitute nen han inbah fuh loh zeuh zeuh a nei chho nual tawh niin an sawi.
‘The Problem’ tia an hriat lar, kum 29-a upa Broner hian tun hnaia Pacman leh Floyd Mayweather te inhnek leh maithei anga an sawi vul chuk chu ninawm a tih thu a sawi a. Miin Mayweather ringawt an buaipui a, a chanchin an sawi lang tlem lutuk chu a ngaithei lo hle niin a sawi.
“Mi hian Pacquiao leh Floyd Mayweather te inhnek leh theih thu an sawi ri reng ringawt a, mahse Floyd hi a chawl chiang tawh niin ka hria. Mi reng reng hian min en kan lui zel ni ber hian ka hria a, ka chanchin hi an sawi tha duh lo tlat zel,” a ti a.
“Ka inhnek hnuhnung panga kha han thlir let ula, world champion hrang hrang ka hmachhawn chho a, inhnek pumpelh tumin ka tlanchhe ve ngai lo a. Ka hmachhawn tur chuan eng weight category-ah pawh title engzat pawh la tawh mahse eng vakah ka ngai lo,” a ti bawk.
A sawi zelnaah, “Manny Pacquiao pawh hi chuti he huin ka dah sang hran lo hle a, amah zawk hian min huphurh hle a. Kei hi fighter danglam tak mai ka ni a, he infiamnaah hian chanchin tha tak tak ka hnutchhiah teuh tawh a. Kan inhnek hunah ka sawp hrep ang a, a hnuah zu ka inpui zui ang,” a ti.