11 Jan 2019 04:56

inkhel

Kum 51 miin contract a la ziak thar

Kazuyoshi Miura chu kum 51 zeta upa ni tawh mahse a khelhna club chuan a contract an la pawtsei leh a, kum khat chhung chu a la inkhelh chhunzawm leh dawn a ni.

Japanese forward Kazuyoshi Miura hi Japanese second division club Yokohama FC ah a khel mek a. 2017 khan Stanley Matthews-a record ding lai, professional footballer zinga goal thun thei upa ber chu a khum a. Kum 18 kalta khan ram tana inkhelh a bansan a, a chawlh hma hian Japan tan vawi 89 khelin goal 55 ngawt chu a thun hman a ni.

‘King Kazu’ Miura chuan, “2019 season atan contract ka ziak thar leh a, min thlawptu leh min ringtu zawng zawngte chungah lawmthu ka sawi a ni,” a ti.

Kazu Miura hian Santos ah bul a tan a, Brazil ramah hian kum eng emaw zat chu a awm a. 1990 khan Japan ram lamah a kir a, J League an tih tan tirh kum khan Gary Lineker leh Zico te chu khumin season tawpah MVP a ni nghal a, J League khelh tan kuma tel, tun thlenga la inkhel awm chhun a ni.

1993 khan Miura hi Asian Player of the Year atan an thlang a, mahse 1998 World Cup squad ah khan an ko tel ve lo a. An ram tan goal 14 thun mahse World Cup an khelh hmasak bera an ko tel lo hian sawi a hlawh viau nghe nghe a ni.

Tun season-ah Miura hian professional football chu kum 34 a khel tling dawn chiah a, kum khat chu a la khel leh dawn ta bawk a ni.

Yokohama manager, Brazilian coach Edson Tavares chuan, “Kum 51 nih tawh chuan chakna kan hloh nasa tawh a, duh angin fit a harsa tawh bawk a. Miura pawh hian tunhma a pha tawh lo hle a, mahse a remchan chang apiangin ka chhawr ve thin a ni,” a ti.

Miura hian February thla hian kum 52 a tling tawh dawn a, 2019 chhunga goal a thun a nih phei chuan record thar a siam thei dawn chiang hle.