Kum 5 atan Pistons leh Dwane Casey an inrem

12th June 2018, 04:06AM

Dwane Casey chu NBA huang chhung atangin a bo rei lo hle a, Detroit Pistons chuan chuan head coach turin an be fel.

Toronto Raptors chuan thla khat vel kaltaah an ban a, a pil bo rei hman lo hle a, Raptors nen hian kum nga chhung atan inremna an ziak fel niin an sawi a. Team hian pangngai taka an la puanzar lem loh avangin a kimchanga hriat theih a la ni chiah lo.

Casey hian Toronto chu kuminah vawi 59 a chakpui a, a vawi khatna atan Eastern Conferenec-ah top seed a nihpui nghe nghe a. Cleveland Cavaliers laka an tlawm avangin Toronto Raptors chuan an ban zui a, kum thum chhung atan Raptors-ah hian contract a ziak a, kum khat la nei mahse an ban ta tho a. Season 7 chhungin 320-238 record a neihpui a, Toronto coach zingah chuan a chakpui hnem ber a ni.

Detroit Pistons chuan an coach leh basketball operations president ni bawk Stan Van Gundy an ban a, thla khat vel chu coach thar tur an zawng ngawrh hle a. Michigan coach John Beilein chu an lalut hman tep a, mahse Beilein hian a lo hnar deuh avangin San Antonio Spurs assistant Ime Udoka lam an hawi leh a. A tawpah chuan Dwane hi an lalut ta a ni.

Pistons hian kum 9 chhungin vawi khat chiah playoff an khel thei a, Eastern Conference finals a zawna vawi 6 lo lut tawh, 2004 NBA title latu, 2005 ah pawh an title humhim tep te hi an tlahniam ta hle a, hei vang hian Dwane Casey chuan hna a ngah dawn viau ang.

Pistons hian Dwane Casey an lakluh hnuah basketball operations head tur an la zawng tel bawk a, hetiang lam buaipui tur hian Ed Stefanski chu senior executive angin an chhawr mek a ni.

Dwane Casey hian NBA team vawi thum a enkawlna a ni dawn a. Morganfield, Kentucky atanga chawr chhuak niin, Wildcats ah a khel thin a, 1978 NCAA title a lakpui a, Joe B. Hall hnuaiah graduate assistant niin 1979 atangin coaching lampang a luhchilh nghal a. A hnuah Eddie Sutton assistan ni turin campus-ah hian a kir leh a. Japan lamah kalin kum nga chhung chu coach in a awm a, a hnuah Europe lamah a tal leh bawk a ni.

Casey hnuaiah hian Raptors chuan Atlantic Division title 4 an la hman a, a zawnin season 5 chhung chu playoff an khel bawk a. Mahse, Toronto hian Cleveland an paltlang thei lo a, playoff vawi thum chu LeBron James leh Cavaliers lakah an tlawm a ni.

Copyright © inkhel.com 2024. All rights reserved.