Nilaini zanlai khan Czech Republic-a mi sing hnih dawn lenna Fortuna Arena-ah UEFA Europa Conference League final khelh a ni a, English club West Ham chuan Italian club Fiorentina hnehin, West Ham hi an champion.

West Ham hian 2-1 in hnehna an chang a, West Ham tan Said Benrahma leh Jarrod Bowen te chuan goal an khung a, Fiorentina goal khat hi Giacomo Bonaventura khung a ni.

Kum 1980 kkhan West Ham hi FA Cup-ah an champion a, hemi hnu hian trophy chawi an nei lo reng a, kum 43 zet a ral hnuah trophy an chawi ve leh ta a ni.

West Ham hian Premier League lamah season an hmang tha lo hle a, point 40 chiah hlawhchhuakin, 14-naah season an khar a, mahse Conference League-a an champion avangin, season tharah Europa League an khel ang.

Final inkhelah hian first half chhungin goal a lut lova, mahse first half-ah hian Fiorentina in ball an chang tam zawk a, inkhel an thunun. First half-ah Fiorentina in goal an thun teuh hle a, Christian Kouame chuan si ban a tauh per a, ball rawn let chuan Luka Jovic chuan goal-ah lo thun mah se, hei erawh offside avangin goal a chhiar a ni lo.

Darkar khat vel an khelhin Biraghi chu a hand ball a, VAR-a  an a nih hnuah West Ham in penalty an hlawhchhuak. Benrahma chuan penalty spot atang hian West Ham hi hma hruaipui mah se, hma an hruai rei lo. Minute nga hnuah Fiorentina in an chhanglet a, Bonaventura chuan top corner ah ball pet lutin, La Viola si phurh a rul.

Team hnih ten chance nei chhunzawm mah se, goal a luh belh lawk tawh lo. Hun pangngaiah chak zawk an awm thei dawn lo emaw tih hnuah, Bowen chuan 90mins-ah chiah West Ham chakna goal a khung a, West Ham hi an champion ta a ni.