06 Feb 2019 10:48

Inkhel

Mizo Sports Website hmasa ber

​Kum 2019 chhunga MMA Fight tura beiseiawm te

Khawvel hmun hrang hrangah Mixed Martial Arts a lar chho zel a, kumin chhunga insual hmuhnawm tura beiseiawm zual, a vaiin kan hmu theilo anih pawhin a tam zawk chu hmuh a beiseiawm hle thung.

1. Robert Whittaker vs Israel Adesanya

Mixed Martial Arts ngaina tan chuan Whittaker leh Adesanya-te insual hmuhnawm zia a hai theih awm lo e. Tunlai MMA fighter-a striker tha ber pahnih huanga dah loh phal chi an nilo. Robert Whittaker-a hian champion ni thei turin fighter tha tak tak Uriah Hall, Derek Brunson, Jacare Souza leh Romero a hneh tawh. February thla hian UFC 234-ah Whittaker-a'n Kelvin Gastelum a hmachhawn dawn a, he fight-a a chak leh hlauh chuan Adesanya tum ngei tura sawi a awm, striker tha pahnih intum tur an ni dawn bawk a, mipui lam pawhin an thlir chak ngei ang.

Adesanya-a hian a fight hnuhnung berah wrestler rothap Derek Brunson-a pawh first round chhung lekin a hnek tlawm. Middleweight Champion Whittaker-a tan fiahna hautak a paltlang na tur te pawh a tih theih ang a, striking tha lutuk Adesanya a la tumloh avangin mi tam tak chuan MMA Fight a neih tawha hautak ber tur angin an sawi. Hemi thleng tur erawhin Gastelum a hneh a ngai dawn a, UFC 234-ah Gastelum a hneh dan azirin Whittaker vs Adesanya-te pawh kan hmu thei ang.

2. Conor Mcgregor vs Nate Diaz 3

UFC-a a ruala weight pahnih ngawta champion thei hmasa ber chu Conor Mcgregor a ni a, Mcgregor-a hian hemi dinhmun a thlen hma hian Nate Diaz-a lakah submission-in a lo tlawm tawh. Rematch-ah Mcgregor decision-in a chak thung a, MMA fans ruhkawl tam tak erawh chuan an intum hnuhnung zawk pawh hian Mcgregor chak zawkah an ngai theilo thung.

Titi a siam nasa a, thenkhat chuan mahni weight aia rit daihah Conor a khelh chhoh avangin a fitness thleng a nghawng thu an sawi a, thenkhat erawhin a weight khelhna lightweight-ah pawh nise, hemi weight-ah hian Nate Diaz a khelh berna a ni thung a, hei mai bakah weight hniam zawkah chuan a taksa che vel pawh a rang sawt ang a, Mcgregor nen pawh intum leh nise; chak zawk tur rinthiam a har mai thei. Mcgregor leh Nate Diaz-te hi a vawi thum nan an intum theih chuan sum lamah pawh tam tak lut tura beisei a ni bawk.

3. Max Holloway vs Conor Mcgregor 2

Fighter pahnihte hi Octagon chhungah an lo intum tawh a, unanimous decision-in Mcgregor a chak. Tun hnaiah erawh Holloway a rawn tha chho hle a, an intum lai khan Holloway a la naupang deuh bawk a, tun hnuah intum leh nise; chak zawk rinthiam a har hle thung. Holloway-a hi Octagon chhunga a insual hnuhnung berah Brian Ortega lakah TKO-in a chak a, chutih laiin Mcgregor erawh Khabib lakah a tlawm thung.

MMA fans tam tak chuan Conor vs Holloway a awm leh anih chuan Mcgregor chak tawhlo tur hialin an ring. Mcgregor-a hi a insual hnuhnung berah chaklo mahse; rei tak a chawlh hnua a rawn kir leh avangin a taksa a fit tawklo tia sawi a awm bawk a, hei mai bakah a hnehloh Khabib-a hi tunlai MMA fighter tha ber zinga ngaih anih vang pawha sawi a awm bawk. Holloway leh Mcgregor an intum leh theih ngat chuan pay per view-ah pawh sum tam tak lut tura beisei a ni a, insual hmuhnawm tak anih ngei rin a ni.

4. Tyron Woodley vs George St Pierre

Mixed Martial Arts ngaina tan chuan George St Pierre hrelo an awmlo hial ang. A hunlai chuan khawvel welterweight champion niin; fighter tha leh rothap tak tak a hneh. Kum rei tak champion anih hnuin hnehtu awm lovin a title belt a dah awl. Kum eng emaw chen a chawlh hnuin Middleweight championship match-ah ropui takin a rawn kir a, Michael Bisping a rawn hmachhawn a, submission-in Bisping a hneh a, Middleweight champion a ni zui. Hemi hnu hian taksa hrisel lohna vangin a title belt a dah awl. Fighter tha tak tak hriat theihna chu fighter tha dang an tum hian a hriat thin a, St Pierre-a'n khawvel welterweight tha ber anih zia a lantir dawn chuan UFC Welterweight Champion Tyron Woodley a hmachhawn hunah ti ila, kan sawi sual tam awm lo e.

Woodley-a hian tunlai fighter tha zawng zawng chu a hneh deuh vek tawh a, vawi hnih lai kickboxing champion hlui Stephen Thompson a hneh a, inpawmchilh thiam tak Demian Maia leh Muay thai Fighter hlui tha lutuk mai Darren Till-te a hneh. George St Pierre-a tan pawh Woodley hmachhawn hi chona lian tak a ni ngei ang. Kutthlak na lutuk maia hriat hlawh Woodley-a'n St Pierre hnek tlawm thei tura ngaih a ni bawk nen. Chutih laiin Woodley-a hian St Pierre-a te ang wrestling background nei tha laka fiahna hautak tak te pawh a tih theih ang.

5. Khabib Nurmagomedov vs Tony Ferguson

UFC Champion Khabib Nurmagomedov-a hian champion anih theih nan fighter rothap tak tak a hneh nual. Michael Johnson, Rafael Dos Anjos, Edson Barboza-te harsa lo deuhin a hneh. Lightweight Championship Match-ah Al Iaquinta a hneh bawk a, a vawikhat title defend naah Conor Mcgregor a sawp hrep bawk. A chak hle a, tharum a nei a, a chau har em em bawk a, hei vang hian a weight division-ah chuan hneh theihloh hial anga ngaih a ni nghe nghe. Khabib-a'n wrestling hmangin a tumpuite a sawisa thin, tharum leh taksa fit kawnga Khabib hneh thei tur rin ber chu Tony Ferguson a ni ngei awm e.

A insual tawh phawt chuan boruak a sang a, lightweight division-a fighter tha zawng zawng a hmachhawn deuh vek tawh. Champion hlui pahnih Rafael Dos Anjos leh Anthony Pettis-te a hneh tawh a, hei mai bakah fighter tha leh rothap tak tak Edson Barboza, Lando Vannata, Kevin lee, Gleison Tibau-te a hneh. A taksa a fit em em a, round a rei pauh leh a phur tulh tulh a ni ber. Khabib leh Ferguson-te hi intum tura ruahman a ni thin a, inhliam leh weight cut harsatna vangin thulh a ni leh thin. Kumin chhunga insual tura ruahman anih ngei beiseina a nasa a, Khabib-a tan pawh fiahna hautak ber a ni ngei awm e.

6. Lyoto Machida vs Gegard Mousasi 2

Contact sport ngaina tan chuan striking game a hmuhnawm a, mipui lam pawh a hip thin. Chutiang fighter huangah chuan Machida leh Mousasi-te hi kan dah thei ngei ang. Machida leh Mousasi-te hi an lo intum tawh a, Machida a chak. Rematch-ah lo intum leh dawn nise, chak tur rinthiam a har hle thung. Bellator Champion Gegard Mousasi-a hi tunhnaiah phei chuan hma a sawn hle a, UFC-a khelh laiin UFC Champion hlui Chris Weidman a hneh nghe nghe. Mousasi vs Machida kan hmu leh thei anih chuan Bellator Middleweight Championship Match-ah anih hmel a, insual hmuhnawm tak pawh a ni ngei ang.

7. TJ Dillashaw vs Dominick Cruz 2

UFC Bantamweight Champion tha ber sawi dawn ila, inhnialna a tam viau mai thei. Kum eng emaw chen chu Dominick Cruz a champion a, Cody Garbrandt laka a tlawm hnuin awlsam takin Dillashaw-a'n Garbrandt a hneh thung a, hetih lai hian Dillashaw-a hi Dominick Cruz lakah a lo chaklo tawh. Tun hnaiah Cruz a inhliam hlauh mai, kumin chhunga a lo kir leh thei anih chuan TJ Dillashaw vs Cruz 2 hmuh a beiseiawm viau.

8. Ryan Hall vs Kron Gracie

Mixed Martial Arts huanga chak thei tur chuan inpawmchilh thiam a pawimawh hle. Hemi lamah ngat chuan Kron Gracie leh Ryan Hall-te hi an duailo hle. Ryan Hall-a hi a insual hnuhnung berah hranghlui fighter BJ Penn-a lakah first round-ah submission-in a chak. A che vel a hmuhnawm a, grappler tha tho Kron Gracie-a lakah erawh a thatzia a hriat ngei ang. Kron Gracie-a hian UFC-ah contract a nei mek a, kumin chhunga intum tur ni tase, mipui tam tak hip ngei tura rin a ni.

9. Jon Jones vs Daniel Cormier 3

Kum 2018 khan Daniel Cormier-a chu MMA fighter of the year atan thlan a ni a, MMA fans tam tak erawhin Jon Jones awmloh vang chauh an ti thung. Cormier-a hi a palian lo hle a, Octagon chhungah erawh amah aia lian a vawrh hneh hle thung. UFC-a a ruala weight hnih ngawta champion thei turin Stipe Miocic K.O-in a hneh a, a insual hnuhnung berin Derrick Lewis a sawp hrep bawk. Hneh theihloh a nei a, chupa chu Jon Jones a ni. Jones-a hian UFC 232-ah Gustaffson hnehin UFC light heavyweight champion thar a ni bawk a, post fight interview-ah Daniel Cormier a cho zui bawk. Kumin hi Cormier-a'n MMA atang chawlh a tum thu a sawi a, a fight tawp berna atan a hneh theihloh Jon Jones-a laka chak ngei chu a duhthusam pawh a ni ngei awm e.