Tennis chanchina player ropui ber pahniha chhal ngam Roger Federer leh Rafael Nadal-te chu Indian Wells khelh mekah semi-final ah an intawng dawn.

Semi final lut turin Federer hian quarter final-ah Hubert Hurkacz chu 6-4, 6-4 in a hneh a, Nadal hian quarter final-ah Karen Khachanov chu 7-6 (7-2), 7-6 (7-2) in a hneh ve bawk.

Quarter final-a Khachanov a hmachhawn tum hian Nadal hi a khup dinglam a dik lova, buaipui a ngaih deuhreng hnuah a chak hrama, semi final khel thei tura a inpeih hman hram a beisei thu a sawi zui bawk.

Tennis player ropui pahnih te inhmachhawn hnuhnun ber hi kum 2017 daih tawh kha niin, Shanghai Masters-ah inhmachhawnin Federer hi straight sets-in a chak.

Grand Slam title vawi 20 la tawh Federer hi Nadal nena an intum hnuhnung pangaah hnehna a chang veka, mahse head-to-head ah erawh Nadal a la chungnung zawka, Nadal hian Federer hi vawi 23 hneh tawhin Federer hian Nadal hi vawi 15 a hneh tawh thung a ni.

Nadal hi a khup dinglam dik tawk loh avang hian a inhnukdawk lovang tih a la sawi theih lova, a inkhelh thei ngei beiesei niin, a khup hian a game-ah nghawng a nei dawn nge nei dawn loh tih pawh a la sawi theih loh.

Nadal hian Grand Slam title vawi 17 lai a la  tawhin, ani aia Grand Slam title la hnem hi Federer bak a awm lo. Hetiang taka player ropui pahnih inhmachhawn leh tur hi tennis khawvelin a nghakhlel hle a, ngaihsak a hlawh hle a ni.