Novak Djokovic chuan Association of Tennis Professionals world singles ranking chhuak thar berah a chung bera awm Rafael Nadal chu a khum a, kum hnih hnuah World No. 1 a ni leh ta.

A hmaa No. 1 dinhmun luahtu Rafael Nadal chu Paris Masters atang khan a pum lam fel loh avangin a inhnukdawk a. Pathianni khan Paris final-ah Serbian star Novak Djokovic chu Russian star Karen Khachanov chuan 7-5, 6-4 in hneh mahse World No. 1 hi a ni thei ta tho a ni.

Paris Masters title latu Karen Khachanov pawh hi a hmaa a dinhmun aia hmun 7 ngawta sangah a chho a, World No. 11 a ni ve bawk.

World No. 1 thar Novak Djokovic (Serbia) chuan point 8,405 a hmu a, amah hnaih bertu Rafael Nadal (Spain) chuan point 7,480 a hmu a, pathumnaa awm Roger Federer (Switzerland) chuan point 6,020 a hmu bawk a ni.

Point 5,300 hmuin Juan Martin del Potro (Argentina) chuan palina dinhmun a hauh a, Alexander Zverev (Germany) chu panganaah a awm a, point 5,085 a hmu a, a hnuai chiahah parukna dinhmun hauhtu Kevin Anderson (South Africa) chuan point 4,310 a hmu a ni.

Marin Cilic (Croatia) chuan point 4,050 a hmu a, pasarihnaah a awm a, Dominic Thiem (Austria) chuan point 3,895 a hmu a, pariatnaah a awm bawk a. Pakuanaa awm Kei Nishikori (Japan) chuan point 3,390 a hmu a, sawmnaa awm John Isner (United States) chuan point 3,155 a hmu bawk a ni.

ATP Top 10:

1. Novak Djokovic (Serbia) 8,045

2. Rafael Nadal (Spain) 7,480

3. Roger Federer (Switzerland) 6,020

4. Juan Martin del Potro (Argentina) 5,300

5. Alexander Zverev (Germany) 5,085

6. Kevin Anderson (South Africa) 4,310

7. Marin Cilic (Croatia) 4,050

8. Dominic Thiem (Austria) 3,895

9. Kei Nishikori (Japan) 3,390

10. John Isner (United States) 3,155