Kum 18 leka upa Lallianzuala'n India Senior team tan a khel

26th December 2015, 03:12AM

Kum 18 leka upa, zanin a India Senior team tan a rawn inlan Lallianzuala Chhangte hi Zohnuai, Lunglei rawlthar niin striker goal thun thei tak a ni a, ke veilam hmangthiam a ni bawk.

Liverpool FC International Academy – DSK Shivajians player pawimawhber pakhat a ni a, season 2 lek chhungin Youth I-League ah goal 25 lai thun tling der tawhin Indian National Football Team scout te mit a la fal bik hle thin bawk a, India U-19 tan khel tura koh niin SAFF Championshiop-ah leh FAM-FRENZ Aseason Champions Trophy-ah te age level-ah India tan kumin khan alo inlan tawh a ni.

India Senior Team tana khel tura koh a nih avangin DSK Shivajans Football Club club pawh hi an lawm hle a, an President chuan Lallianzuala avanga hlawhtlinna lian tak an tawng nghal mai hi a lawmthu sawiin, "Kan Youth Player India tana khel tura koh an han ni nghal mai hian tun kum 2 lek chhugin hmasawnna nasa tak kan nei tih a rawn tarlang chiang hle a, DSK Group minti hmingtha em em tu niin India National Team tantunah leh nakin zelah tha taka a khelh a India ram ti hmingthatu a nih zel kan beisei a ni" tiin a sawi.

Liverpool FC International Academy – DSK Shivajians Head coach Dave Rodgers pawhin hahip a Lallianzuala hi fakin, "Kan academy a tupawh mai hian Lallianzuala hlawhtlinna hmuh hi kan lawmpui hle a, amah hi talent nei tha em em, hlawhtling tura tumruhna leh huaisenna nasa tak nei a ni bawk" tiin a fak bawk a ni.

Lallianzuala Chhangte hi 2015 SAFF Championship khel turin India team-ah koh niin zanin a match an khelh zawh takah India hian Robin Singh-a goal hnih hmangin Sri Lanka chu an hneh a, min 77-na kum 18 leka upa Lallianzuala hian Robin Singh-a rawn thlakin India tan Lallianzuala hi a rawn inlan a ni.

Copyright © inkhel.com 2024. All rights reserved.