14 May 2019 10:17

inkhel

Kum 18 hnuah Roma captain De Rossi a chhuak dawn

Daniele De Rossi chuan kum 18 zet a lo khelh tawhna Roma chu season tawpah hian chhuahsan a tum thu a sawi.

Kum 35-a upa Daniele De Rossi chuan tun season tawp thleng chiah hi contract a nei tawh a, hei vang hian a contract tawp rualin a khelhna club chu chhuahsan zui a rilruk a. A kum tam chho ve tan tawh mahse khelmualah tih theih a la neih thu sawiin, chawlh lampang chu a la sawi ri chiah lo a ni.

Thawhlehniah De Rossi hian chanchinthar lakhawmtute hmaah chhuah a tum thu hi a puang a ni.

De Rossi chuan, “Season tawp hunah ka contract ka hmang zo tawh dawn a, he club hi ka chhuahsan tawh hmel hle a. He hun lo thleng tur hi ka lo thlir lawk tawh a, rilru lampang inpuahchahna hun pawh ka lo hmang tawh nghe nghe a ni,” a ti.

“Keima thutlukna siam ni tho mahse ka thutlukna siamah ka lawm dawn lo a ni tih chu ka hre sa a. Inhliam vanga enkawl lai, bandage vela intuam lek luk, che tha thei lo ang veltein ka in mitthla chhin vel thin a, ka suangtuahnaah club chuan chhuak lo turin min lo thlem vel thin,” tiin nui chungin a sawi bawk.

A chhuah tur thu a puannaah hian Roma player te chu tlar hmasa berah an thu vek a, an team jersey an ha a, a hnungah hian De Rossi hming a inziak vek a. Striker Edin Dzeko chuan hma hruaiin De Rossi chu standing ovation an pe a, a hnuah a teammate te chu De Rossi hian a kuah kim vek bawk a ni.

Thawhtanni khan club chuan an captain hi contract ziah belhtir an tum lo tih an hrilh a, De Rossi chuan a hma daih atanga a lo rin lawk tawh a nih thu a sawi.

“Niminah khan contract min ziahpui an tum tawh loh thu an sawi chiang a, mi a ka ni bik lo a, kum 36 ka tling dawn tawh a, an rilru pawh ka hrethiam thlap a ni,” tiin mittui tla lek lekin a sawi.

“Thla 10 chhung tu mahin an biak loh che chuan chhuah a hnai tih chu a chiang mai a. Ka tawng tlem em em a, a chhan pahnih a awm thei ang a. Pakhatnaah chuan ka tawng tam peih loh vang a ni a, pahnihnaah chuan thuthang a awm palh ka hlau a. Thuthang a tam chuan team boruak ka tichhia ang a, an rilru ka la peng thei dawn a, min tantute leh mi dangte rilru ka tibuai vak thei bawk a ni,” a ti bawk.

De Rossi hian Roma tan game 615 a khel hman a, an club tana game khelh hnem lamah pahnihna niin, Francesco Totti chiah tluk loh a nei a, hengah hian goal 63 chu a thun hman a. Tun season chhungin inhliam vangin league game 17 chiah a khel thei a ni.

Roma president James Pallotta chuan Daniele De Rossi chu contract ziah belhpui dawn tawh lo mahse player ang ni loin, mawhphurhna dang chelh tur chuan engtik lai pawhin an lo dawngsawng thei tih a sawi chhuak a. An club thuneitute chuan director ni turin De Rossi hi an be deuh niin an sawi.

Italy tan De Rossi hian game 117 a khel tawh a, goal 21 chu ram tan hian a thun tawh a. 2006 FIFA World Cup ah Italy chu a champion pui a ni. 2018 World Cup playoff ah Sweden an hneh lo a, an ram chu khawvela ram inelna ropui berah an tel thei ta lo a. Hemi hnuah hian De Rossi chuan ram tana inkhelh a chawlhsan zui nghal a ni.

Roma tan game hnih a la khel leh ang a, Sassuolo khelmuala an kal hnuah anmahni khelmualah tun season chhunga an game hnuhnung ber atan Parma nen an inhmachhawn leh ang a. Hemi hnu hian Italy ram pawn lamah khelhna tur a zawn a rinawm hle.