Minnesota Timberwolves chuan Denver Nuggets chu 112-106 a hnehin kum 14 zet an khelh theih tawh loh playoff an khel thei ve dawn ta.

A khup hliam dam hnua a vawi thum inlannaah Jimmy Butler chu a che tha hle a, point 29 zet a score theih bakah assist 5 neiin rebound 5 a la bawk a. Inkhelh hmain Timberwolves coach Tom Thibodeau chuan Butler hi ruahman aia rei chhawr a tum thu a sawi a, a sawi ang tak hian minute 42 chu a khelhtir a. Jeff Teague pawhin point 17 a thun ve bawk.

Season kharna game boruak sang tak maiah hian mi tam tak chuan Karl-Anthony Towns leh Andrew Wiggins te che vel an lo mitmei bik bawk a. Towns hian point 26 score in rebound 14 a la a. Wiggins pawhin point 18 a score a, 3-pointer vawi 3 a thun bawk a ni.

Denver Nuggets tan Nikola Jokic chu a che tha viau a, point 35 a score bakah rebound 10 a la a, mahse a team te chu a chakpui zo ta chuang lo a. Nuggets guard Will Barton pawhin point 24 a thun bakah rebound 8 leh assist 5 a nei bawk a. Nuggets player te hi an la naupan deuh hlawm avangin chak rih lo mahse an hmabak a eng hle.

Timberwolves hian nipui lai khan Chicago Bulls atangin Jimmy Butler an lalut a, invawrh chhoh viau an tum lai a ni a, playoff hi khel thei lo ta se an tan a zahthlak dawn hle a. Beiseina sang tak neiin an kal chho a, mahse Butler a inhliam tak hlauh avangin Thibodeau pawh a buai hman hle a ni.

Kar tawpa Western Conference quarter final Game 1 ah Minnesota Timberwolves hian Houston Rockets an hmachhawn dawn a ni.