Arsenal atanga Laurent Koscielny chhuah chhan kha hlawh piah lam thil vang a nih thu Bordeaux chairman Joe DaGrosa chuan a sawi chhuak.

Laurent Koscielny chu Emirates Stadium-ah kum 9 zet a awm hman a, hemi hnuah hian kumin nipui transfer window inhawn lai khan France ram lam a pan ta daih a. North London-ah thla 12 chhung contract a la neih chu a hmang zo ta lo a ni.

Koscielny hian a chhuah dawn hnaihah Arsenal chhuahsan ngei a duhzia a tilang nasa hle a, season tan hmaa America rama Gunners-in hun an hmannaah pawh a kal ve duh lo a. Hetianga a awm hnuah hian a duhthusam thil chu a thleng ta a, Bordeaux chu a zawm ta a ni.

Bordeaux chairman Joe DaGrosa chuan Koscielny chu kum 10 dawn England rama a awm hnuah an ram lama kir leh a chak hle niin a sawi a, a duhthusam ang tak chu an club hian an lo tihhlawhtlinsak niin a sawi.

Joe DaGrosa chuan, “Laurent Koscielny khan a duh ber chu France rama kir leh a ni a, a bik takin a chhungte awmna bawra club lian Bordeaux zawm hi a duh ber chu a ni a. Keini chauh lo pawh club dang pawhin an hmutai viau a, kan hnena kal kha a thlang ta ber a ni,” a ti.

“Player tawn hriat ngah tak mai kan nei thei hi a lawmawm kan ti hle a, player naupang zawkte a kaihruai thei zel dawn a. Inkhelh a chawlhsan hnuah pawh Koscielny hi kan hnenah a awm zui zel theih phei chuan a tha dawn lehzual a ni,” a ti bawk.

A sawi zelnaah, “Inkhelh chawlhsan mah se football huanga a la awm zui zel duh chuan kan club hian remchang kan siamsak theih ngei ka ring a, hun rei zawk kan la thawhho theih hi kan beisei hle a ni,” a ti.

“Kan inbiak tirh atang khan keini chuan hlawh lampang ngawr ngawr kan ngaihtuahpui lo a, nakin thlenga kan inzawm theih dan tur kan ngaihtuah tel nghal a. A rilru kan hneh theihna ber pawh hi hlawh piah lam thil a ni deuh ber a, a chawlh hunah an chhungkua chu khawi lam nge panpui a tum tih zawhna pawimawh tak kha kan zawt a, kha kha engkim tidanglamtu chu a ni berin kan hria,” tiin a sawi.

“A thinlung kan hneh a, a rilru kan hmin fel thei ta hlauh a, club mai ni loin chhungkaw thar a rawn zawm dawn tih kan hrilh a ni,” tiin Joe chuan a sawi a ni.

Laurent Koscielny chuan Arsenal tan game 353 a khel hman a, captain nihna pawh hun eng emaw chen chu a chelh nghe nghe a. Bordeaux tan Ligue 1 ah vawi 3 chu bul a tan tawh a, a club thar hian vawi 4 khelhah point 5 chiah an la hmu thei thung a ni.