Manchester City manager Pep Guardiola chuan an captain chhuak mai tawh tur Vincent Kompany chu thlak mai mai theih a nih dawn loh thu a sawi a, a ngai dawn hle niin a sawi a bawk.

Kompany hian City chu FA Cup a chawipui zawh hnuin club a chhuahsan tawh tur thu a sawi a, a contract zawh rualin thlalehah City chu a chhuahsan fel ang.

Kompany hian a lo chawr chhuahna Belgian club Anderlecht a zawm dawn a, Anderlecht-ah hian player ni chungin manager hna a thawk bawk dawn a, player-manager a ni ang. City-ah hian kum 11 chhung a cham tawh a, hemi hun chhung hian game 360 khel hmanin Premier League title pali bakah FA Cup pahnih leh League Cup pali-te a chawi hman a ni.

Pep Guardiola chuan, “Vinnie (Kompany) hian huhang a ngah em em a, kan tan season tawp lamah a pawimawh hle bawk. Vinnie hi thlak mai mai theih a ni dawn lova, mi tin hian chakna lai nei theuh mah ila Vincent-hi chu a sial bik a ni. Kan ngai dawn hle a, keipawhin ka ngai dawn em em a ni,” a ti.

Sawi zelin, “Manchester City hian player ropui tak tak; Mike Summerbee, Tony Book, Francis Lee leh Colin bel-te an lo nei tawh thin a, anni avang liau liau hian City hian vawiin an lo thleng. Mahse Sheikh Mansour-a’n a lei hnu leh Khaldoon chu chairman a nih hnuah chhuan thar player an awm tan a, he club chanchin hi a ziak thar.

“Joe Hart, Vincent Kompany, Sergio Aguero, Yaya Toure leh David Silva-te chu player ropui tak tak a ni a, anni hian he club hi chak takin hmalam an lo panpui tawh. Vincent-a ngei pawh hian he club hi ka lo thlen hma pawhin ram ropui a lo thlen[ui tawh a, ka lo thlen hnu pawhin ram ropui min thlen tir bawk. A kal leh zelna turah duhsakna ka hlan tak meuh meuh va, he club chhungkuaah hian engtik lai pawhin a tel reng dawn a ni,” a ti bawk.