India cricket captain Virat Kohli chu cricket thiam ber atan an thlang a, BCCI chuan chawimawina sang ber, Polly Umrigar Award an hlan.

Thawhleh zan khan BCCI chuan award an sem a, hetah hian Virat Kohli chu 2016-17 season leh 2017-18 season chhunga Best International Cricketer atan an thlang a, chawimawina hi an hlan a ni.

Virat Kohli hian 2016-17 season chhungin game 13 khelhah run 1332 ngawt mai a vawi chhuak a, a average chu 74 a ni a. Delhi batsman hian limited over format bikah game 27 khelhah run 1516 a siam a, a average chu 84.22 a ni.

2017-18 season chhungin Test vawi 6 khelhah Kohli hian run 896 a siam a, ODI ah chuan a average 75 a ni.

Chawimawina sem zanah hian Smriti Mandhana chu hmeichhe zinga thiam berah thlangin, International Cricketer of the Year 2017-18 chawimawina an hlan bawk a. Harmanpreet Kaur chuan 2016-17 season chhunga a chet that avangin Player of the Year chawimawina a dawng bawk.

International cricketer mai bakah hian domestic player te pawhin chawimawina an dawng hlawm a. Jalaj Saxena, Parvez Rasool, Krunal Pandya te chu domestic cricket khawvelah an chet that avangin chawimawina hlan an ni.

Jalaj Saxena leh Parvez Rasool te chu Ranji Trophy-ah an che tha bawk a, an pahnih hian ‘Best All Rounders’ atan thlan an ni a. Krunal Pandya chu Hazare One-Day Championship ah a che fuh bawk a, chawimawina an hlan phah bawk a ni.

England captain hlui Kevin Pietersen chu he hunah hian a tel a, MAK Pataudi Memorial chungchangah thu a sawi a, Indian cricketer ni lo zingah chuan hetiang dinhmuna ding thei hmasa ber a ni.