25 Feb 2020 04:33

inkhel

Kobe thih khan ka peng pakhat a thi ve: Jordan

Michael Jordan chuan Kobe Bryant a thih khan amaha peng pakhat chu a thihpui ve niin a sawi.

Kobe Bryant leh a fanu te chuanna helicopter chu January 26 ah khan a chesual a, a chhunga chuang mi 9 te chu an thi vek a. Calabasas a chesual Kobe Bryant te pafa sunna hun chu Los Angeles khawpuia Staples Centre-ah Thawhtanni khan an hmang a ni.

He hunah hian mi thahnem tak an pung khawm a, mipui hmaah hian vawi ruk ngawt NBA champion lo ni tawh, basketball icon Michael Jordan chuan thu a sawi a, Kobe Bryant a ui zia a sawi chhuak.

Jordan chuan, “Kobe Bryant a thih khan keimaha peng thenkhat hi a thi tel ve a ni. Helai hmuna rawn kal khawmte ka thlir pawh hian in peng pakhat chu a thi ve hlawm a ni tih ka hria,” a ti.

“Basketball huang te, ni tin nunah te, chhungkaw pa a nihnaah te Kobe khan engkim mai kha a titawp vek a ni ringawt mai a. A hnuhma a hnutchhiah dan hi hriatthiam a har em em mai a ni,” a ti bawk.

Thu a sawi lai hian Michael Jordan chu a insum thei lo a, hnuk ulh chungin thu chu a sawi chhunzawm zel tho a. “Tu te pawhin unau kan nei hlawm a, ka tan chuan Bryant kha ka nau ang deuh a ni ve mai a. Khawvela basketball player tha ber nih a duh thin a, amah ka hriat chian lehzual hnuah khan a tana u tha tak nih ngei kha ka tum thin a ni,” a ti.

Vanessa pawhin rilru khawih zet mai thu a sawi a, basketball legend Shaquille O’Neal bakah comedian Jimmy Kimmel leh Phoenix Mercury star Diana Taurasi te pawhin thu hi an sawi bawk a ni.

Mipui sang tam tak kal khawmte hi Beyonce, Alicia Keys leh Christina Aguilera te chuan zaiin an awi a. Ticket an hralhna atanga pawisa an hmute chu Lakers chuan Mamba and Mambacita Sports Foundation tan an hlan dawn a ni tih an puang a ni.

February 7 ah khan Corona Del Mar a Pacific View Memorial Park ah Kobe Bryant leh a fanu kum 13-a upa Gianna te chu an phum tawh a ni.