Kobe Bryant-a towel hman hnuhnun ber chu tun hnaiah khan internet kal tlangin an lilam a, $33,000 (£27,000/Rs. 25,19,385) zetin an hralh.
Los Angeles Lakers star Kobe Bryant chuan NBA game a khelh hnuhnun berin Los Angeles khawpuia Staples Center-a mipui pungkhawm hmaah thu a sawi a, ‘Mamba Out’ tiin court chu a chhuahsan a. Hemi tum hian a towel chu a bat a, hei hi amah ngaisangtu pakhat chuan a lo la a, he towel hian zinkawng thui tak a zawh zui a ni.
Towel hi a latu hian a hralh a, hemi hnuah hian vawi eng emaw zat chu an lo hralh chhawng tawh a. Pathianniah khan internet lamah towel hi an lilam leh a, a rual hian April 13, 2016 a an inkhel enna ticket pahnih pawh an lilam tel a. A tawpah chuan $33,077.16 (£26,666.81) zetin towel hi an hralh thei a ni.
April 13, 2016 zanah hian Los Angeles Lakers chu Utah Jazz nen an inkhel a, Lakers chu 101-96 in an chak a, Bryant chuan point 60 ngawt a score nghe nghe a ni.
Pathiannia towel lilamtu Iconic Auctions president Jeff Woolf chuan Kobe Bryant-a towel hlui leitu chu Lakers ho thil khawn khawm nasa em emtu a nih thu sawiin, khawvel hmun hrang hrang atangin Lakers thil hlui chu a lei khawl teuh tawh niin a sawi.
Jeff Woolf chuan, “Towel leitu kha Lakers ngaisang em emtu a ni a, a hma atang tawhin Lakers thil hlui chi hrang hrang hi a lei khawm hnem tawh hle a. Southern California-ah engtikah emaw museum la siam theih a duh a, chutiang chu tihpuitlin theih a tum a ni,” a ti.
Woolf chuan tuna towel leitupa hian a hmain middle school vela Kobe Bryant-a yearbook pawh $30,000 in a lei tawh niin a sawi.
Kum 41-a upa Kobe Bryant leh a fanu kum 13-a upa Gianna te bakah mi dang pasarih chuanna helicopter chu Calabasas, California ah January 26 ah khan a chesual a, a chhunga chuangte hi a hmunah hian an thi vek a ni.
Bryant chuan season 20 chhung chu Lakers tan a khel hman a, hengah hian NBA title vawi 5 a la a. 2007-08 ah khan NBA Most Valuable Player niin, All-NBA ah vawi 15 an thlang a, All-Star vawi 18 niin, All-Defensive team member vawi 12 a ni bawk a. NBA Finals ah MVP atan vawi hnih an thlan bakah All-Star Game MVP atan vawi li an thlang bawk a ni.