Kobe Bryant te post-mortem result an puangzar
Kobe Bryant te chuanna helicopter chetsual chungchang an chhui zuinaah post-mortem result a chhuak a, a chhunga chuangte kha ruihtheih thilah an fihlim vek a, hliam na tak tuarin nunna an chan nghal vek niin an sawi.
Post-mortem result hi phek 180 zet niin, kum 50-a upa pilot Ara Zobayan taksaah khan damdawi ruih chi emaw, zu emaw hmuh an neih loh thu tar lan a ni a. Kumin January 26 a California khawpuia chhum zing nasa tak kara an chetsual chhan ber chu an la chhui mek a ni.
Los Angeles County coroner office lam chuan helicopter kha a chhe hneh hle niin an sawi a, a chhunga chuangte kha an ruh pawh a tliak nasa hle nia sawiin, taksa peng thenkhat pawh a thlawn nual hlawm a, an thawmhnaw kang bang velah chuan tuialhthei rim pawh a nam nasa hle niin an sawi bawk.
Juan Carrillo, senior deputy medical examiner chuan, “An hliam han en khan rei tak an dam a rinawm vak lo a, an chetsual rual deuh thawa nunna chan nghal nia ngaih theih an ni,” a ti.
Helicopter chesualah hian kum 41-a upa Los Angeles Lakers star hlui Kobe Bryant bakah a fanu kum 13-a upa Gianna te an chuang a. Anni pafa bakah hian Gianna basketball team-mate pahnih leh an chhungte ve ve an tel bakah an coach pawh a tel ve bawk a. Thousand Oaks-ah tournament khel tura kal an ni a, Bryant pawh coach anga awm turin a kal ve a ni.
Bryant te leh pilot bakah hian Alyssa Altobelli, John Altobelli, Keri Altobelli, Sarah Chester, Payton Chester leh Christina Mauser te chu nunna chante hi an ni a. An chetsual hnuah hian thuneitute chuan an chetsual chhan hi ngawrh takin an chhui zui nghal vat a, thutlukna mumal erawh an la nei thei rih lo a ni.
An chetsual dawn hian pilot tawn hriat nei tha tawh tak Zobayan chuan chhum chhah lutuk pumpelh tumin ding takin a thlawh chhohpui a, vei lama a kawi vak takah chuan helicopter chu lei lamah a tla ta niin an sawi.
Leia a tlak lai vel hian helicopter chu 184 mph vela chaka tla niin an sawi a, heti a nih chuan minute khata feet 4,000 aia thui mah tla hman anga chhut a ni a. Hetiang taka a tlak chak avang hian a insawh na hle dawn a ni tih chu a chiang hle.
