13 Feb 2020 03:47

inkhel

Kobe Bryant te pafa an phum tawh

Kobe Bryant leh a fanu Gianna te chu kar hmasaah khan an chenna in bulah mi tlemte pungkhawm hmaah an phum niin an sawi.

Basketball legend Kobe Bryant bakah a fanu leh mi dang pasarihte chu January 26 khan helicopter in an chesual a, helicopter chhunga chuangte hi an vaiin an thi vek a. A death certificate-a a lan danin kar hmasa Zirtawpniah khan Newport Beach, California-a an chenna bulah an phum niin a inziak.

NBA legend Kobe te an phumna hi US media te chuan Pacific View Memorial Park, Corona del Mar a nih thu an tarlang a. February 24 ah hian an pafa pualin Staples Center, Los Angeles-ah sunna hun an hmang dawn a, hetah hian mi 20,000 vel zette chu pung khawm tura ngaih an ni.

Thawhtanniah khan Kobe Bryant-a nupui Vanessa chuan Instagram lamah a rilru hrehawm thu a puang chhuak a. “Ka rilru leh thinlung hian Kobe leh Gigi te hi kan zingah an awm tawh lo a ni tih hi an la pawm thei ngang lo,” a ti.

Vanessa chuan, “Kobe hi he leiah a awm tawh lo a ni tih pawm luih ka tum thin a, chutih lai chuan ka taksa hian ka fanu duat Gigi hi a rawn kir tawh dawn lo a ni tih hi pawm harsa a la ti em em mai a ni,” a ti bawk.

A sawi zelnaah, “A dik thei lo a ni. Ka fanu tih theih miah tawh loh tur, tuk tin ka la tho chhuak thei bik ziah mai a, hei ringawt pawh hi a fel lo hle a. Ka ngaihtuah chian poh leh ka thin a rim thar mai a. A nunkhua a la hmang chho dawn chauh a ni si a,” a ti.

“Ka inngaihtuah chiang a, chhel taka awm zel tur ka nihzia te, huaisen leh chak taka ka fanu pathum te dana ding zel tur ka ni tih ka ngaihtuah chhuak leh thin a ni,” tiin a sawi.