28 Jan 2020 06:48

inkhel

Kobe Bryant te helicopter chungchanga thu thenkhat

Pathiannia NBA legend Koby Bryant te chuanna helicopter chesual chu thuneitute chuan ngawrh takin an dap kual zel a, Los Angeles County huam chhunga Calabasas khamah nasa takin hma an la zel a ni.

Vawiin thlenga ruang zawn hna an thawhnaa hriat theih chin thenkhat han tarlang ila.

* Los Angeles County Coroner Office chuan ruang pathum hmuh a nih tawh thu sawiin, tu ruang ber nge tih hriat a nih theihna turin forensic science center lamah an kalpui tih an sawi.

* Helicopter chesual hmutute chuan thil duhawm lo tak thlen lai hian chhum a zing nasa hle niin an sawi a. Chhum a zin nasat em avangin a hnuah pawh Los Angeles Police Department leh Los Angeles County Sheriff Department te pawhin an helicopter te chu an tumtir ve ve a ni.

* National Transportation Safety Board member Jennifer Homendy: “Chetsualna rapthlak tak a ni a. Kan chhui zuinaah hian kan uluk hle a, mihring, khawl leh a chhehvel zawng zawng chu kimchang takin kan chhui kual vek dawn a. Sik leh sa kha thil pawi thlen theihna chhan lian tak niin kan hria.”

* Air traffic controller te’n an chhinchhiah danin Kobe Bryant te chuanna helicopter pilot khan a thlawhpui hniam deuh hlek niin a hriat theih a, hei vang hian chhum chuan a tibuai vak lo tura ngaih a ni.

* Federal Aviation Administration (FAA) chuan khatiang khaw nuam vak lo kara thlawk chhuak turin FAA hnen atangin pilot te chuan phalna an lak a ngai kher lo a, thlawh chhuah kha an tan a him dawn nge dawn lo tih chu pilot te hian an ngaihtuah fel tur a ni tih an sawi.

* Gary Robb, aviation lawyer chuan, “Pilot leh air traffic control inbiakna atang kha chuan helicopter kha chhum zing pumpelh tumin a thlawk hniam tial tial niin a ngaih theih a. Khatianga a thlawh hniam tak zelah chuan kan duh loh thil a thleng ta niin a ngaih theih,” a ti.

* Mi thiamte chuan Kobe Bryant te chuanna Sikorsky S-76B chu rintlak tak, him thawkhat viaua ngaih a nih thu an sawi a. A chhuitute chuan khawl lampang fel lohna a awm leh awm loh an chhui tel ang.

* National Transportation Safety Board chuan Sikorsky S-76B chu Orange County, Santa Ana huam chhunga John Wayne Airport atangin a thlawk chhuak tih an sawi a, an thlawh chhuahna atanga mel 80 vela hlaa awm, Camarillo khuaa airport lam an pan niin an sawi.

* Helicopter chetsualna hmun hi Los Angeles atanga mel 40 vel bawr, Calabasas khaw daifema Santa Monica kham pangah a ni.

* Pilot bakah mi dang 8 te, kum 41-a upa Kobe Bryant leh a fanu kum 13-a upa Gianna te telin an thi vek nia ngaih a ni.

* Pilot Ara Zobayan kha flight instructor thin niin, khatianga khaw nuam vak loah pawh thlawk thei tur khawpa thiam a ni.