11 Feb 2020 10:35

bakteaJr.

Mizo tlangval

​Kobe-a nupuiin a pasal leh fanu thihna a la pawm thei lo

Kan hriat tawh theuh angin January thla mai khan NBA legend Kobe Bryant leh a fanu Gianna-te bakah midang pasarih te chuan helicopter chesualah an nunna an chana, Kobe-a nupui Vanessa chuan a pasal leh a fanu te thihna chu pawm harsa a la tih thu a sawi.

Kobe hian a nupui Vanessa bakah hian a fanu dang pathum-te a kalsana, a fanu dang pathum te hi Natalia, Bianka leh Capri-te niin, an la naupang hlawm hle.

Kobe-a nupui Vanessa chuan, “Ka thluak hian Kobe leh Gigi-te an awm ta lo mai hi a pawm duh lova, an thihna hi a ruala pawm harsa ka ti hle. Kobe a awm tawh lo pawm ka tum mek laiin, ka hnenah Gigi a lo kir tawh dawn lo tih hi ka taksa in a hre bawk.

“Ka thin a rima, ka fanu hian a hmalamah hun tam tak a la nei. A hrehawm ka ti a, ka fanu hian a hmalama chance tha tak tak a neih te a chhawr tangkai thei lo tur hi a pawi ka ti. Mahse ka fanu dang pathum te tan chhel taka ka awm a ngai tih ka hre chhuak thin. Kobe leh Gigi-te bula ka awm lo hi ka thin a rima, mahse Natalia, Bianka leh Capri-te nena kan awm ho avangin ka lawm a ni.

“Ka rilru put hmang hi thil pangngai a ni a, mi kan sun chuan heti ang rilru hi kan pu thin. Mahse ka paltlang ang paltlang mek te an awm takin he thu hi ka sawi a. Ka hnenah hian awm se ka va ti em! He mumang rapthlak tak hi tawp tawh se aw. He thil rapthlak tak tuartu te zawng zawng hi ka tawngtaipui renga, kan zavai hian min tawngtaipui reng turin kan ngen bawk a che u,” a ti.

Kobe leh fanu-te hi January ni 26 khan basketball tournament chhim turin an kala, mahse chesual ta in, mi 9 in nunna an chan. Nunna chan te hi Kobe leh Gianna bakah Orange Coast College baseball coach John Altobelli leh a nupui Keri bakah an fanu Alyssa an ni a, Harbor Day School assistant coach Christina Mauser pawh nunna chan zingah hian a tel.

Basketball player naupang Payton Chester leh a nu Sarah Chester te bakah helicopter khalhtu Ara Zobayan-te pawh nunna chan zingah hian an tel a ni.