Knight atan Andy Murray an nemnghet

17th May 2019, 02:05AM

Andy Murray chu Prince of Wales chuan knight atan a nemnghet a, tennis lampanga a thawh hlawk vang leh midang tanpuina kawnga a thawh hlawk vanga hetiang dinhmuna ding hi a ni.

Prince Charles chuan Buckingham Palace-ah Andy Murray chu knight atan hian a nemnghet a, nemngheh a nih hnuah hian Murray chuan a fanu pahnihte chu he hun ropui tak hrethiam ve thei khawpa upa ni ve tawh se a tih thu a sawi.

Sir Andy Murray chuan nemngheh a nih hnuah hian, “Knight nihna min hlan hi a ropui ka tiin, hetiang dinhmuna ka ding thei hi ka inchhuang hle a. Kan chhungkuaa he huna kan tel thei hi a lawmawm ka ti em em a, ka nupui leh ka chhungte chu an rawn tel thei a ni,” a ti.

“He hunah hian ka fate chu hruai tel ve theih ka duh viau a, mahse an la naupan deuh avangin an tel ve ta lo a. Ina ka haw hunah ka medal hi ka entir ve tawh mai ang,” a ti bawk.

Scot tennis star Murray leh a nupui Kim te chuan fa pahnih an nei tawh a, kum 3-a upa Sophia Olivia leh thla 18-a upa Edie te an nei a. 2016 New Year Honours-ah knight atana nemngheh tur thu hi an puang tawh a ni.

Knight nihna an hlan turte hi an duh hun an thlantir a, Murray hi a buai chhoh em avangin an nemnghet thei lawk lo a. A khel na a buaipui zui leh bawk avangin duh anga hmain hun hi an hmang thei ta lo a ni.

Kumin January thlaa Australian Open an khelh khan kumina Wimbledon khelh zawhah a khel na vang chuan hreh tak chungin tennis khelh chawlhsan a tum thu a sawi a. Chanchinthar lakhawmtute hmaah lungchhe tak chungin chawlh a puan tur thu hi a sawi chhuak a ni.

Roberto Bautista Agut nen set nga an inkhel a, Murray chuan level sang bera inkhel zel turin a theihnain a la tlin a ni tih a lantir a. Hemi hnuah hi chuan theihtawp chhuahin inkhelh zui zel a tum thu a sawi tar leh a ni.

Nilaini khan Sir Andy Murray hian kum 32 a tling chiah a, a khel chu an zai tawh a, tunah chuan dam chho thei turin a inenkawl mek a ni.

Copyright © inkhel.com 2024. All rights reserved.