​Klopp-a'n min duh a nih chuan min rawn dawr rawh se - Gotze

10th January 2016, 09:01PM

Liverpool manager Jurgen Klopp chuan a player hlui tuna Bayern Munich tana khel mek Mario Gotze a ngaihven niin media lamah tarlan a ni.

Hemi chungchang hi Mario Gotze chuan a lo hre ve a, a boss hluiin a duh tak tak a nih chuan min rawn dawr rawh se a ti e. Borussia Dortmund-ah Gotze leh Klopp-te hi an lo inhrawn tawh a, Liverpool chuan inhliam an ngah avangin January transfer window-a player thar lei an tum nia report a ni. Mario Gotze pawh Liverpool ngaihven zingah a tel nghe nghe nia sawi a ni bawk.

Season chawhnu lam atana inbuatsaih nan Bayern Munich chuan Doha, Qatar-ah training camp an nei mek a, hetah hian Gotze chuan Liverpool beiseina ti thar turin thu leh hla a rawn nei a ni.

"He thuleng vak hi khawi atanga irh chhuak nge a nih ka hre lo. Indawrna engmah a awm lo. Liverpool hian min duh tak tak a nih chuan Klopp-a hian min rawn dawr rawh se. Inkhelh tam loh hi chuan a hrehawm duh hle, hetih lai hian hetiang hi chu football khelh chhung chuan a thleng reng reng a ni." tiin Gotze chuan a sawi.

Klopp-a hnuaia khelh leh a chak em tih an zawhna chu nui pahin,"2017 thleng hetah hian contract ka nei a, nia kan thlir phawt dawn nia. Tun dinhmunah chuan tuman min be lo." tiin a chhang. Season tharah Carlo Ancelotti chuan Bayern Munich a enkawl tan tawh dawn a, coach thar hnuaiah hmun chan tam a inbeisei em tih zawhna chu,

"Tun dinhmunah hi chuan engkim hi thleng thei vek a ni. Season tawpah enge thleng dawn kan hre thei ang. Nia, coach thar hian engtin chiah nge min ngaihpawimawh dawn tih chu heta ka cham leh cham loh chhan tur niah ka ngai. Inhliam vangin ka inkhel tam hlei lova, coach thar game plan azirin ka hmalam hun chu ka ngaihtuah ang." tiin a chhang.

Copyright © inkhel.com 2024. All rights reserved.