Kum 30 hnua Liverpool league title lakpui leh thei hmasa ber German manager Jurgen Klopp chu League Managers Association Manager of the Year atan a thlan a ni.

Hmeichhe lamah Chelsea hmeichhe team manager Emma Hayes chu FA Women’s Super League Manager of the Year atan an thlang bawka, Hayes hian Chelsea chu league title a lakpui.

Championship lamah Leeds United champion pui tu Argentine manager Marcelo Bielsa chu Championship Manager of the Year lawmman a dawng bawk.

Manchester United manager hlui Sir Alex Ferguson chuan Manager of the Year lawmman Klopp-a hnena a hlan hian thu tlem sawiin, “In phu takzeta, i team an khel tha em em a, i mizia hian club chhung zawng zawng a fan chhuak hneh em em bawk.

“In champion thu min hrilh tura zing dar 3-a min rawn kaihthawh avang pawhin ka ngaidam che, ka lawm e,” a ti.

Klopp hian Liverpool hi game 7 la awmin a champion pui theia, pahnihnaa awm Manchester City aiin point 18 laiin an sang zawk bawk.

Klopp chuan LMA award a dawn chungchang sawiin, “League Managers Association manager of the year lawmman ka dawng thei hi ka lawm em em a, hei lawmman hi ka mi ngaihsan em em Sir Alex Ferguson-a hming chawia Sir Alex Ferguson trophy tih a ni. He lawmman hi ka tan a hlu lehzuala, a chhan chu ka manager pui te bawkin an thlan vang a ni,” a ti.